Hafoin palestra no sesaun temátika sira durante loron tolu, Kongresu Nasionál Edukasaun nian da-3 ne’e hakotu ho Deklarasaun ida. Iha diskursu maktakak, Primeiru-Ministru, Rui Maria de Araújo, promete ona katak “Governu liuhusi Ministériu Edukasaun, sei haka’as an hodi habelar iha nível nasionál, to’o ninia mandatu remata, hodi kompromete mós atu informa ba Ezekutivu oin-mai kona-ba importánsia husi rekomendasaun sira ne’e”.

Deklarasaun Finál ne’e aprezenta rekomendasaun 37, ne’ebé fahe ba área importante neen:Kurríkulu Nasionál Ensinu nian; jestaun no formasaun ba profesór sira; administrasaun no inspesaun eskolár, infraestrutura, ekipamentu no rekursu edukativu sira; jestaun Ensinu Superiór públiku no privadu nian; partisipasaun husi inan-aman sira, husi komunidade, husi setór privadu no husi parseiru sira seluk.

Rui Maria de Araújo ko’alia liu ba “serbisu ne’ebé dezenve husi funsionáriu públiku sira edukasaun nian” no Na’i ulun ne’e prova katak “laiha funsionáriu sira ne’e mak ita sei laiha ‘Diagnóstiku ba área importante 6 husi setór edukativu “

Atu elabora no aprova polítika ida ba uzu Lian ofisiál sira, propoin revizaun ba Lei Baze sira Edukasaun nian, kria polítika jestaun nian ida ho formasaun kontínu ba profesór sira, aliña formasaun inisiál profesór sira nian ho Kurríkulu Nasionál ba nível ensinu nian hothotuu no hametin mekanizmu sira ligasaun nian entre eskola no empreza sira maka hanesan rekomendasaun balu ne’ebé  aprezenta ona.

Deklarasaun destaka mós “nesesidade atu aumenta alokasaun anuál fundu públiku nian sira iha setór Edukasaun nian, ho hanoin atu atinji forma konsistente no kontinuada, 15% to’o 20% husi Orsamentu Jerál Estadu” nian. Haree mós ba “revolusaun mentalidade sira atu konkretiza valór foun, hahalok no komportamentu sira husi funsionáriu públiku sira Edukasaun nian”.

Kongresu hala’o entre loron 15 no 17 fulan-maiu no ho tema “Edukasaun hanesan pilár hametin identidade no dezenvolvimentu Nasaun nian”. Marka prezensa iha eventu ne’e, ilustre konvidadu sira maka hanesan antigu Prezidente Repúblika no Prémiu Nobel Paz nian, José Ramos-Horta, antigu Primeiru-Ministru no Atuál Prezidente Rejiaun Administrativa Espesiál Oe-Kuse Ambenu, Mari Alkatiri, Reitór Institutu Filozofia no Teolojia Fatumeta nian, Padre Domingos Alves da Costa, no fundadór universidade  dahuluk iha territóriu Timor-Leste, Enjiñeiru Mario Viegas Carrascalão.

Ba leitura detallada liután husi deklarasaun ne’e nian, bele klik iha-ne’e.