Primeiru-Ministru, Dr. Rui Maria de Araújo, loke konferénsia nasionál ho tema “Feto no labarik-feto, partisipa ativa no reativa iha dezenvolvimentu sustentavel”, ne’ebé hala’o iha loron 10 fulan-maiu tinan 2017, iha Otél Novo Turismo, iha Dili.

Objetivu husi konferénsia ida ne’e maka atu halibur reprezentante sira husi setór oioin atu diskute no fó hanoin ba malu hodi kontribui ba konkretizasaun objetivu kona-ba igualdade jéneru husi Ajenda Dezenvolvimentu Sustentavel 2030.

Rui Maria de Araújo hateten katak presiza reforsa no sensibiliza liután movimentu boot iha mundu tomak, inklui Timor-Leste, kona-ba oinsá maka garante partisipasaun ne’ebé maka’as liután husi feto no labarik-feto sira iha dezenvolvimentu nasaun idak-idak nian.

Tuir Xefe Governu nian, Timor-Leste tenke sente orgullu tanba nasaun ne’e aprova ona objetivu lubuk ida husi Objetivu sira Dezenvolvimentu Sustentavel (ODS) nian. No dehan katak maske iha dezafiu, nasaun ne’e iha biban durante tinan 15 nia laran atu prova ba nia povu katak nasaun ne’e bele dudu prosesu dezenvolvimentu sustentavel, liuliu ho envolvimentu ne’ebé maka’as liután hosi feto no labarik-feto sira.

Tanba ne’e, Xefe Ezekutivu ne’e husu ba timoroan hotu-hotu, atu feto ka mane, serbisu hamutuk no labele halo diskriminasaun bazeia ba jéneru. Ba mane tenke fó apoiu maka’as ba feto sira, ba labarik-feto sira tenke fó an tomak atu to’o ba sira-nia objetivu, no ba labarik mane sira tenke prova katak sira ema ne’ebé maka respeita igualdade jéneru.

Na’i-ulun ne’e deklara katak tempu to’o ona atu ita tau iha prátika, hodi labele halo diskriminasaun ba feto tanba evidénsia iha mundu hatudu ona katak dezenvolvimentu sei bele la’o ba oin bainhira laiha diskriminasaun ba feto.