Soru-mutu Konsellu Ministrus iha loron 11 fulan Novembru tinan 2009
GOVERNU KONSTITUSIONAL IV
SEKRETARIA ESTADU KONSELLU MINISTRUS
KOMUNIKADU BA IMPRENSA
Reuniaun Konsellu Ministrus nian ba loron 11 fulan Novembru tinan 2009
Konsellu Ministrus hala’o soru-mutu iha loron Kuarta ohin, loron 11 fulan Novembru tinan 2009, iha Sala Soru-Mutu Konsellu Ministrus nian, iha Palásiu Governu, iha Díli, no analiza:
1. Aprezentasaun kona-ba “Enkuadramentu Estratéjiku ba Dezenvolvimentu Rurál iha Timor- Leste (2010-2030)”
Objetivu dokumentu ne’e nian mak orienta Governu no doadór sira ba estratéjia komún ida konaba Dezenvolvimentu Rurál iha tinan rua nulu oin mai, tanba haree katak ida ne’e mós sai nu’udar Prioridade Nasionál ida husi hirak seluk.
Dezenvolvimentu Rurál kobre setór oioin, tanba ne’e, Enkudaramentu Estratéjiku elabora liu husi konsulta ho ministériu hotu no ezerse iha tempu ne’ebé hanesan hó polítika no estratéjia husi setór hirak ne’ebé relevante. Parseiru dezenvolvimentu nian sira, reprezentante sira sosiedade sivíl nian no funsionáriu relevante sira Estadu nian husi distritu sanulu resin tolu iha Timor-Leste hetan mós konsulta. Ida ne’e importante tebetebes, tanba Governu iha hela prosesu desentralizasaun nian, no lori oportunidade atu halo di’ak liután prestasaun servisu públiku sira ne’ebé esensiál.
2. Aprezentasaun Planu Asaun nian husi Komisariadu EXPO 2010 Xangai Xina
Ho loron Espozisaun Munidiál Xangai nian ne’ebé bsesik dadaun, Komisariadu aprezenta ba Konsellu Ministrrus knaar hirak ne’ebé dezenvolve ona no asaun hirak ne’ebé presiza atu garante kapasidade, organizasaun no operasionalidade ba Reprezentasaun Timor-Leste nian. Espesífiku liu, aprezenta planu asaun nian no orsamentu to’o tinan nia rohan.
3. Aprezentasaun Kódigu Traballu Foun ba Timor-Leste
Esbosu husi Kódigu Traballu ne’ebé aprezenta iha Konsellu Ministrus reflete empregadór no traballadór Timor-Leste nian sira nia hakarak, sira ne’e mak fó kontribuisaun ne’ebé boot tebetebes ba elaborasaun Kódigu ne’e nia elaborasaun.
Aprovasaun no adopsaun ba dokumentu ida ne’e reprezenta hakat ba oin boot ida ba País ne’e iha atualizasaun no modernizasaun sistema jurídiku traballu nian, nune’e hodi promove defeza no garantia direitu empregadór no traballadór sira nian hodi kontribui ba manutensaun ba pás sosiál iha Teritóriu Nasionál tomak.
