Akordu foun sira ne’ebé asina ona entre Uniaun Europeia no Timor-Leste ne’e prevee asisténsia ida hamutuk euro millaun 61,3 ba tinan lima oin mai. Akordu hirak ne’e asina ona iha loron 30 fulan-marsu husi Ministru Negósius Estranjeirus no Kooperasaun, iha prezensa husi Embaixadór Uniaun Europeia nian iha Timor-Leste..

Programa hirak ne’ebé inklui iha akordu ne’e foka ba iha reforsu husi jestaun no reforsu supervizaun finansas públikas nian sira, nune’e mós iha parseria sustentavel ba setór agroflorestál no silvikultura.

Inisiativa sira ne’ebé inklui iha programa agroflorestál sei dezenvolve liuhusi kooperasaun ne’ebé delega iha ajénsia alemaña nian GIZ no iha Organizasaun Internasionál Traballu nian, sei hala’o liuliu iha Munisípiu Baukau, Kovalima, Lautein, Manatutu, Manufahi no Vikeke.

Programa apoiu nian ba governasaun di’ak inklui komponente rua, ida dahuluk iha apoiu orsamentál diretu ba Ministériu Finansas no apoiu ida seluk hala’o liuhusi kooperasaun ne’ebé delega iha Camões – Institutu Kooperasaun no Lian nian, ne’ebé sei apoia instituisaun superiór sira ne’ebé hala’o knaar kontrolu nian hanesan Parlamentu Nasionál, Prokuradoria-Jerál Repúblika, Kámara Kontas no Polísia Sientífika Investigasaun Kriminál (PSIK) Timor-Leste nian, no sira seluk tan.

Uniaun Europeia maka hanesan ida husi parseiru prinsipál lima husi kooperasaun internasionál iha Timor-Leste. Atu informa de’it katak, hahú kedas husi tinan 1999, apoiu sira ne’ebé fó ona ba nasaun ne’e liu ona dolar millaun 300.