Governu Timor-Leste

Prezidénsia Konsellu Ministrus

VI Governu Konstitusionál

..............................................................................................................................

Dili, loron 25 fulan-abríl tinan 2017

Komunikadu Imprensa

Sorumutuk Konsellu Ministrus nian iha loron 25 fulan-abríl tinan 2017

Konsellu Ministrus hala’o sorumutuk iha loron tersa ne’e, iha Palásiu Governu, iha Díli, no aprova tiha ona atualizasaun resenseamentu eleitorál iha rai-li’ur ba eleisaun parlamentár oinmai. Molok operasoins resensiamentu nian, Sekretáriu Tékniku Administrasaun Eleitorál sei promove kampaña divulgasaun públika nian ida, ne’ebé inklui distribuisaun informasaun kona-ba resenseamentu eleitorál iha rai-li’ur ba komunidade timoroan sira ne’ebé hela iha Austrália, Korreia Sul, Portugál no Reinu Unidu. Diploma ne’e hato’o husi Ministru Koordenadór Asuntus Administrasaun Estadu no husi Ministru Negósius Estranjeirus no Kooperasaun.

Aprova tiha ona mós asinatura ba akordu entre Governu Repúblika Demokrátika Timor-Leste nian no Governu Reinu Tailándia nian ba vistu livre ba titulár pasaporte diplomátiku no servisu nian sira, ne’ebé aprezenta husi Ministru Negósius Estranjeirus no Kooperasaun.

Aprova ona Dekretu Governu nian ne’ebé kria aktu prosedimentu administrativu sira kona-ba asesu ba dokumentu ofisiál sira. Dekretu Governunian  ne’e define regra sira ne’ebé mak órgaun no servisu Administrasaun Estadu nian, munisípiu sira no empreza públika sira atu halo tuir, hanesan forma ida atu garante direitu ba ema sira ne’ebé mak iha interese atu iha asesu ba dokumentu ofisiál sira, hatama iha modelu Administrasaun ida ne’ebé nakloke (aberta). Diploma ne’e, propoin husi Gabinete Primeiru-Ministru nian, atu ezekuta ba Rejime Asesu ba Dokumentu Ofisiál sira.

Sistema informátiku Asycuda World Governu deside hodi hili ona hanesan plataforma ba kriasaun Janela Únika Eletrónika Timor-Leste nian. Sistema Automátiku kona-ba Dadus Aduaneiru sira nian (Asycuda World) ida ne’e, propoin husi Ministériu Finansas no aprezenta hamutuk ho Komisaun Reforma Fiskál nian, hanesan aplikasaun informátika ida ne’ebé halo jestaun ida kona-ba informasaun sira alfándega nian ne’ebé integra tomak. Sistema ne’e utiliza ona iha país 90 no inklui norma internasionál hotu-hotu ne’ebé relasiona ho dadus sira kona-ba komérsiu internasionál ne’ebé inklui iha konvensaun no rekomendasaun sira husi organizasaun sira hanesan Organizasaun Mundiál Alfándega sira nian ka Organizasaun Mundiál Komérsiu nian. Ho prosedimentu sira ne’ebé simples, modernu no transparente, sistema ne’e fó dalan ba Governu atu halo kontrolu ida ne’ebé di’ak liu ba fronteira sira. Sistema ne’e mós halo tuir objetivu ida husi objetivu sira Reforma Fiskál nian, ne’ebé Governu define, kona-ba kriasaun Janela Únika Eletrónika Nasionál nian, ne’ebé, tanba fó dalan ba ligasaun entre servisu sira Administrasaun Públika nian, fasilita ninia utilizasaun husi setór privadu.

Konsellu Ministrus aprova ona entrega kontratu sira kona-ba fornesimentu kombustivel kamaan ba sentrál elétrika rua EDTL nian (Hera no Betanu), iha tinan 2017 no 2018, ne’ebé mak aprezenta husi Ministériu Obras Públikas, Transportes no Komunikasoins, hamutuk ho Komisaun Nasionál Aprovizionamentu. Komisaun ne’e, iha Ministériu Planeamentu no Investimentu nia okos, maka dirije konkursu internasionál ne’e, no husi konkursu ne’e maka rezulta ona rekomendasaun sira ne’ebé daudaun ne’e Governu aprova.

Hili (nomeia) ona membru na’in-haat ne’ebé sei tama ba Konsellu Jerál Universidade Nasionál Timor Lorosa’e (UNTL), to’o tinan 2021. Husi membru sanulu-resin-lima ne’ebé forma órgaun konsultivu Universidade públika ne’ebá, depende ba Konsellu Ministrus atu hili na’in-haat, entre sira haat, ne’e ida husi membru Governu no na’in-tolu nu’udar reprezentante husi sosiedade sivíl. Proposta ida ne’ebé analiza ona iha sorumutuk loron 11 fulan-abríl nian, agora lori Konsellu Ministrus hodi nomeia Maria do Céu Sarmento da Costa, Ministra Saúde nian; Madre Guilhermina Marçal, reprezentante meiu relijiozu nian; Hernâni Soares, reprezentante husi setór privadu; no Aniceto Barreto, reprezentante husi klibur no orden profisionál sira, ne’ebé hili ona nu’udar Prezidente ba Konsellu Jerál ida-ne’e

Fó ona lisensa investidór nian ba Li Tjien Development ba konstrusaun Timor Fortuna Sentrál Plaza nian. Projetu ne’e aprezenta ona husi Ministru Koordenadór ba Assuntus Ekonómikus no Ministru Agrikultura no Peskas, hamutuk ho empreza, ne’ebé iha ona empriendimentu oin-oin iha nasaun ne’e. Timor Fortuna Sentrál Plaza sei iha torre rua ho apartamentu, loja, eskritóriu, fatin divertimentu nian no fatin pára transporte nian, no sei harii iha Avenida Nicolau Lobato. Investimentu besik millaun dolár 70, ho konkluzaun ne’ebé prevee ba tinan 2020. Durante hala’o konstrusaun, projetu ne’e sei kria postu serbisu nian 1200 resin; tuir, sei iha postu serbisu nian ne’ebé fiksu besik rihun 4.

Gabinete Primeiru-Ministru nian aprezenta ona Projetu kona-ba rejime ne’ebé aplika ba Auditoria Sosiál. Proposta ne’e sei aprezenta ba Konsellu Ministrus iha sorumutuk ruma iha futuru, hafoin hatama mós  rekomendasaun sira ne’ebé dadaun ne’e ministru sira halo. REMATA