Governu Timor-Leste

Parlamentu Nasionál aprova ona, iha globalidade no ho lian ida de’it (unanimidade), proposta Lei kona-ba Investimentu Privadu, iha loron 25 fulan-abríl.

Lei ida ne’e, ne’ebé hetan ona aprovasaun iha Konsellu Ministrus iha fulan-jullu tinan kotuk, buka atu promove investimentu liuhusi garantia jerál sira ba investidór sira hotu no benefísiu espesiál sira ba investidór sira ne’ebé halo tuir ezijénsia adisionál balu. Tanba ne’e, kondisaun sira ne’e atrativa tebes, nune’e fasilita investimentu privadu rai-laran no rai-li’ur, no ho nune’e, promove dezenvolvimentu setór privadu nian iha Timor-Leste.

Lei ne’ebé agora hetan ona aprovasaun ne’e, mai moderniza Lei kona-ba Investimentu Privadu ida uluk no armoniza lejizlasaun ne’e ho lejizlasaun husi nasaun sira iha Asosiasaun Nasoins Sudeste Aziátiku sira (ASEAN).

Proposta Lei ne’e elabora husi Gabinete Ministru Estadu, Koordenadór Asuntus Ekonómikus (MEKAE), nakloke ona ba konsulta públika no hetan ona diskusaun husi Governu ho Ministériu prinsipál sira, setór privadu no ho parseiru dezenvolvimentu nian sira.