GOVERNU KONSTITUSIONÁL IV

SEKRETARIA ESTADU KONSELLU MINISTRU

KOMUNIKADU IMPRENSA

Sorumutuk Konsellu Ministrus loron 23 fulan Setembru tinan 2009

 

Ohin Kuarta-feira, loron 23 fulan Setembru tinan 2009, Konsellu Ministrus hala’o sorumutuk iha Sala Sorumutuk Konsellu Ministrus nian, iha Palásiu Governu, iha Díli, no aprova tiha ona:

1. Rezolusaun kona-ba Komisaun atu haree hikas fali Misaun Forsa Estabilizasaun Internasionál

Haree ba estabilizasaun seguransa iha Timor-Leste, iha tinan rua ikus ne’e nia laran, períodu ne’ebé fó atensaun mós kona-ba estabilidade sosiál no polítika efektiva, no hodi halo ita nia rain iha forsa seguransa no defeza ne’ebé iha kapasidade atu kumpre misaun ne’ebé fó ba sira, Governu deside atu nomeia Komisaun ida atu halo avaliasaun kona-ba nesesidade atu kontinua mantein prezensa Forsa Estabilizasaun Nasionál, (ISF) iha territóriu.
Estatutu ISF harii iha fulan Maiu tinan 2006, liu husi akordu ida, asinadu entre governu Timor-Leste no Austrália, hodi estabelese fali situasaun seguransa nasionál. Tuir akordu ida ne’e, forsa polisiál no militar hotu-hotu, nasionál no internasionál, sei xefia hosi komandu autralianu.
Iha fulan Agostu tinan 2006, rezolusaun ida husi Konsellu Seguransa nasoens Unidas nian, mai revoga (hasai tiha) liafuan balu husi kordu ida ne’e, hodi fó mandatu ida ba UNMIT hodi halo restaurasaun no manutensaun ba orden públika iha Timor-Leste.
Iha Dezembru tinan 2006, Komandu Polísia, nasionál no internasionál, entrega tiha ba Nasoens Unindas hafoin halo tiha assinatura akordu ida ho UNMIT, hodi regula relasaun entre UNPOL no Estadu Timor-Leste.
Iha Janeiru tinan 2007, liu husi akordu trilaterál entre Timor-Leste, Austrália no Nasoens Unidas, rekoñese tiha katak, kbit polísia nian ne’ebé fó ba sira, tuir akordu assinadu iha fulan Maiu tinan 2006 – labele aplika ona.
Nune’e, haree kona-ba alterasaun Misaun ISF, Konstituisaun Repúblika Timor-Leste no desizaun foin lalais ne’e nian husi Konsellu Defeza no Seguransa, Governu, hatan ba desizaun Konsellu Superiór Seguransa, deside ona atu nomeia Komisaun ne’ebé sei haree fila fali Misaun ISF, iha Timor-Leste.

2. Dekretu-Lei ne’ebé aprova Orgánika Servisu Migrasaun

Kriasaun Servisu Migrasaun – haketak hosi PNTL husi IV Governu Konstitusionál – reprezenta oportunidade ida atu dezenvolve organizasaun ida, orientada husi servisu profisionál sira ne’ebé iha kapasidade atu ezekuta meta hirak ne’ebé Governu define tiha ona, ba aktividade migrasaun.
Servisu Migrasaun iha responsabilidade jerál tuir termu lei Imigrasaun i Azilu, atu kontrola movimentu ema sira nian ne’ebé mak tama no sai husi paíz, hodi kontrola no monitoriza mós prezensa ema estranjeiru iha territóriu nasaun nia laran.
Dezenvolvimentu Lei Orgánika Servisu Migrasaun nian, hodi assegura atu servisu iha kondisaun organizasionál no lejislativa nesessária, atu hala’o jestaun migratória ida ne’ebé diak.

3. Dekretu-Lei ne’ebé aprova Estatutu Pesoál Servisu Migrasaun nian

Servisu Migrasaun (SM), harii hanesan entidade ida ne’ebé ketak, dependente diretamente ba Membru Governu Responsável ba Área Migrasaun, no nia estatutu pesoál SM nian, tenke regula hosi ninia lejislasaun rasik.
Nune’e, implementasun ba Lei Orgánika Servisu Migrasaun, ezije atu harii karreira rejime espesiál ida (hodi fó konsiderasaun ba prinsípiu Lei no Regulamentu Funsaun Públika nian) ne’ebé ajusta ba konteúdu funsionál no ba estrutura espesífika SM nian.

4. Rezolusaun ne’ebé aprova Polítika Nasionál Kultura

“Koloka Kultura ba servisu afirmasaun Nasaun no Estadu timorense” nu’udar prioridade ne’ebé define tiha ona husi IV Governu Konstitusionál iha ninia programa ba períodu lejislativu entre tinan 2007 no 2012.
Prezervasaun no divulgasaun ba patrimóniu no valór kultural no artístiku Timor-Leste nian, prevee tiha ona iha polítika ida ne’e, liu husi konjuntu liña asaun ida, ne’ebé inklui kriasaun lejislasaun, apoiu ba programa investigasaun, edukasaun no formasaun, no edifikasaun infraestrutura.
Nune’e Governu mak iha kompeténsia atu koordena no ezekuta polítika ne’ebé defini tiha ona, atu haree liu ba prezervasaun patrimóniu kulturál, hodi promove mós apoiu ba asosisaun no atividade kulturál, apoiu ba promosaun kona-ba fó sai informasaun ne’ebé iha interese kulturál, iha suporte barak-barak, nune’e mós kolaborasaun ho entidade sira seluk ne’ebé iha atensaun liu ba knar ne’ebé relevante iha área kulturál.
Lei Órgánika Ministériu Edukasaun nian, prevee no define Biblioteka Nasionál hanesan Institutu Públiku ne’ebé atu harii, hodi asume responsabilidade kona-ba jestaun biblioteka no nível nasionál.