Fatin: Otél Novu Turizmu, Dili
Data: loron 19 no 20 fulan-abríl

Iha semana ida ne’e, Timor-Leste sei sai uma-na’in ba Forum Rejionál husi Asosiasaun Nasoins Sudeste Aziátiku (ASEAN) nian ne’ebé sei debate kona-ba “Diplomasia preventiva iha ambiente ida pós-konflitu nian”.
Hahú husi tinan 2015 Timor-Leste sai hanesan membru Forum ida ne’e nian ho direitu tomak. Forum ne’e ninia objetivu mak atu promove diálogu konstrutivu ida kona-ba kestaun polítika sira no kestaun seguransa nian sira iha nivel rejionál no internasionál.
Eventu ne’e prezide hamutuk husi Timor-Leste, Singapura no Zelándia Foun, no entre timoroan sira ne’ebé sei sai oradór maka Prémiu Nobel Pás nian no antigu Prezidente Repúblika José Ramos Horta no Ministru Justisa, Dionísio Babo.
Hein katak bele hola parte iha Forum ne’e partisipante kura-kuran 100 hosi nasaun sira hanesan Brunei, Kamboja, Indonézia, Laos, Malázia, Burma, Filipina, Singapura, Tailándia no Vietname, ne’ebé maka hanesan membru sira ASEAN nian; Austrália, Kanadá, Xina, Uniaun Europeia, Índia, Japaun, Zelándia Foun, Repúblika Koreia, Rúsia no EUA; nune’e mós nasaun observadór sira organizasaun ne’e nian, hanesan Papua-Giné Foun no Timor-Leste.