Sorumutuk Konsellu Ministrus nian iha loron 11 fulan-abríl tinan 2017
Prezidénsia Konsellu Ministrus
VI Governu Konstitusionál
..............................................................................................................................
Dili, loron 11 fulan-abríl tinan 2017
Komunikadu Imprensa
Sorumutuk Konsellu Ministrus nian iha loron 11 fulan-abríl tinan 2017
Konsellu Ministrus hala’o sorumutuk iha loron tersa ne’e, iha Palásiu Governu iha Dili, no aprova ona proposta sira husi Ministériu Obras Públikas, Transportes no Komunikasoins ba ratifikasaun konvensaun tolu kona-ba Direitu Tasi nian, hodi haruka ba Parlamentu Nasionál. Proposta sira ne’e maka hanesan: Konvensaun Internasionál ba salvaguarda Ema nia Moris iha Tasi, tinan 1974 nian (Konvensaun SOLAS); Konvensaun Internasionál ba Prevensaun Poluisaun husi Ró tinan 1973 nian (Konvensaun MARPOL); no Konvensaun Internasionál kona-ba Padraun sira Formasaun, Sertifikasaun no Servisu Kuartu ba Marítimu sira nian, tinan 1978 nian (Konvensaun STCW78).
Relatóriu husi konkluzaun sira kona-ba investigasaun ba alegasaun peska ilegál, husi empreza rai-li’ur nian ida, iha territóriu Timor-Leste, ne’ebé hato’o ona ba Konsellu Ministrus husi ekipa interministeriál ne’ebé harii tuir despaxu Primeiru-Ministru nian. Rekomendasaun sira ne’ebé aprezenta ona iha relatóriu ne’e, aumenta tan ho sira seluk, ne’ebé hato’o hosi ministériu barak, ne’ebé sei hatama iha testu, hafoin sei halo diskusaun liután. Investigasaun ne’e hala’o ona husi responsavel sira Gabinete Primeiru-Ministru nian, Polísia Nasionál (PNTL), Polísia Marítima, Servisu Migrasaun, Komponente Navál Forsa Defeza nian (F-FDTL) no husi Alfándega sira, ne’ebé lidera husi Ministériu Agrikultura no Peskas.
Ministru Estadu, Koordenadór Asuntus Ekonómikus no Ministru Agrikultura no Peskas hato’o ona ba Konsellu Ministrus konteúdu husi akordu tolu ne’ebé asina ho Organizasaun Nasoins Unidas nian ba Alimentasaun no Agrikultura (FAO): Timor-Leste - Reforsu reziliénsia nian ba komunidade sira ne’ebé hasoru bailoro-naruk; Favorese kooperasaun transfronteirisa ba jestaun sustentávél husi tasi Indonéziu sira nian; no Apoiu ba preparasaun Sensu Agríkola dahuluk Timor-Leste nian.
Minitériu Saúde aprezenta ona akordu kolaborasaun nian iha área dezenvolvimentu rekursu umanu sira iha setór Saúde nian, ne’ebé sei asina entre Ministériu Saúde no Universidade Nasionál Fiji nian, ba estudante timoroan sira ne’ebé sei ba tuir kursu saúde nian, iha universidade ne’ebá.
Sekretária Estadu Juventude no Desportu no Liga Futeból Amadór Timor-Leste nian aprezenta ona projetu ida kona-ba harii estádiu futeból nian 8 ne’ebé ho kualidade Internasionál iha Timor-Leste, iha ámbitu politíka apoiu nian ida ba dezenvolvimentu atividade ida ne’e iha país.
Universidade públika ne’e aprezenta ona proposta nomeasaun ida ba membru na’in-haat hodi tama iha Konsellu Jerál Universidade Timór Lorosa’e (UNTL) nian to’o tinan 2021. Husi membru na’in-15 ne’ebé halo parte iha Konsellu Jerál UNTL nian, Konsellu Ministrus maka sei nomeia na’in-haat, ne’ebé husi sira na’in haat ne’e, ida husi membru Governu no na’in-tolu reprezentante husi sosiedade sivíl. Konsellu Ministrus sei halo fali análize ba proposta ne’e, hafoin halo análize ba perfíl kandidatu sira nian husi Ministériu Edukasaun. Remata
