Ministru Estadu no Prezidénsia Konsellu Ministru no

  Portavós ofisiál Governu Timor-Leste

 Díli, loron 7 fulan-abril tinan 2017

 Governu halo reforma sira atu apoia kreximentu setór privadu nian

Aprovasaun ba Lei kona-ba Sosiedade Komersiál sira husi Parlamentu Nasionál, iha loron 27 fulan-marsu, hanesan pasu importante ida atu pakote lejizlasaun Governu nian ne’ebé apoia kreximentu setór privadu no promove diversifikasaun ekonómika iha Timor-Leste, bele tama iha vigór. Atualizasaun lejizlativa kona-ba regra sira ne’ebé regula funsionamentu sosiedade komersiál sira ne’e, hasai medida sira ne’ebé la iha justifikasaun no introdús artigu sira ne’ebé destina ona atu fasilita espansaun merkadu privadu nian. Lei ne’e simplifika prosesu kriasaun no jestaun empreza ki’ik no empreza média sira, hodi halo prátiku liután rejime legál ne’ebé aplika ba negósiu empreza sira nian, introdús mekanizmu atu hadi’a imajen komersiál Timor-Leste nian ba-iha istituisaun estranjeira sira no aumenta koerénsia husi lejizlasaun komersiál iha país ne’e.

Lei kona-ba Sosiedade Komersiál sira ne’e, hamutuk ho lejizlasaun ne’ebé hetan ona aprovasaun husi Governu no husi Parlamentu Nasionál no lejizlasaun sira seluk ne’ebé sei hein apresiasaun no votasaun husi Parlamentu, halo parte ba pakote reforma nian ida ne’ebé Matadalan Governu nian ba Reforma no Fomentu Ekonómiku Timor-Leste tinan 2015-2017 nian hatete “kria ambiente ida ne’ebé favoravel ba implementasaun no funsionamentu ne’ebé efikás kona-ba kustu sira husi atividade emprezariál sira”.

Diploma sira ne’ebé foin daudaun hetan aprovasaun husi Konsellu Ministrus ne’e inklui : Proposta Lei kona-ba Arbitrajen, Mediasaun no Konsiliasaun, ne’ebé garante asisténsia legál no rezolusaun ba letíjiu sira (asaun sira ne’ebé entrega ona iha tribunál) ho lais; Proposta Lei kona-ba autorizasaun lejizlativa iha matéria rekuperasaun empreza sira nian no insolvénsia, ne’ebé sei lori ba kriasaun Kódigu espesiál ida atu halo lei kona-ba kestaun sira ne’e; Dekretu-Lei kona-ba Rejistu Komersiál, ne’ebé tau-hamutuk iha dokumentu ida de’it, regra sira ne’ebé aplika ba rejistu empreza sira; no Dekretu-Lei kona-ba Servisu Rejistu no Verifikasaun Emprezariál (SERVE), ne’ebé define SERVE ne’e nu’udar institutu públiku mesak de’it ne’ebé maka bele halo servisu rejistu komersiál nian no servisu nesesáriu sira seluk ba promosaun ambiente ideál ida ba negósiu sira no investimentu.

Atensaun kona-ba lei husi Governu Konstitusionál VI nian foka liu ba Regulamentu kona-ba Rai no Propriedade sira, ba Dezenvolvimentu Infraestrutura Ekonómika sira, ba Regulamentasaun Laborál no Dezenvolvimentu Forsa Serbisu nian, ba Reforma Ambiente Negósiu sira nian, ba Reforma Fiskál, ba Reforma Sistema Investimentu Privadu nian no ba Reforma no Dezenvolvimentu Setór Privadu.

Portavós, Ministru Estadu Agio Pereira, hatete katak “Governu kontinua halo aplikasaun ne’ebé rigoroza husi ninia programa reforma nian sira, ho objetivu atu hala’o lalais dezenvolvimentu ekonómiku liuhusi promosaun investimentu privadu nian, hodi  kria kondisaun sira atubele aumenta tan biban ba serbisu ne’ebé sustentavel no hodi promove diversifikasaun husi ita-nia ekonomia”. REMATA