Ministériu Solidariedade Sosiál fó kedas apoiu diretu ba família 150 vítima husi udan boot ne’ebé halo bee sa’e iha Postu Administrativu Metinaru, liu-liu iha Aldeia Manleu, Suku Duyung.

Iha loron 30 fulan-marsu kalan, udan boot estraga uma barak no iha loron tuirmai, loron 31 fulan-marsu, Ministra Solidariedade Sosiál, Isabel Amaral Guterres, no Vise-Ministru, Miguel Marques Gonçalves Manetelu, ba kedas fatin akontesimentu ne’e. Akompaña husi ekipa fó tulun nian ba dezastre naturál sira, ne’ebé inklui autoridade lokál sira iha área ne’ebé refere. Sira fahe tiha ona apoiu emerjénsia nian ba família sira, hanesan foos, mina-bimoli, sardiña lata, sabaun, pasta kose-nehan, moskiteiru no seluk-seluk tán.

Vise-Ministru Manetelu fó hanoin katak, bainhira akontese dezastre naturál sira, Ministériu Solidariedade Sosiál nafatin fó apoiu emerjénsia ba komunidade, liuhosi Diresaun Nasionál Jestaun Dezastre nian. Maibé servisu sosiál sei hala’o hamutuk fali hosi Munisípiu Díli no Diresaun Nasionál Dezastre nian, ne’ebé verifika no identifika estragu sira ne’ebé maka provoka husi  akontesimentu idak-idak.

Haktuir mós katak importante liu maka tenke kria koordenasaun interministeriál ida di’ak, atu Ministériu Obras Públikas, Transportes no Komunikasoens hatene oinsá bele kria kondisaun sira hodi hamenus problema sira ne’ebé maka provoka husi mota, ne’ebé iha tempu udan halo mota boot no sobu komunidade sira-nia uma.