Sorumutuk Konsellu Ministru loron 4 fulan-abríl tinan 2017
Prezidénsia Konsellu Ministrus
VI Governu Konstitusionál
..............................................................................................................................
Dili, loron 4 fulan-abríl tinan 2017
Komunikadu Imprensa
Sorumutuk Konsellu Ministrus nian iha loron 4 fulan-abríl tinan 2017
Konsellu Ministrus hala’o sorumutuk iha loron-tersa ne’e, iha Palásiu Governu, iha Dili, no aprova ona proposta kona-ba Rezolusaun, ne’ebé aprezenta husi Ministériu Finansas no atu haruka ba Parlamentu Nasionál, atubele adere ba Akordu ne’ebé harii Banku Aziátiku Investimentu nian iha Infraestrutura sira. Proposta ne’e mosu nu’udar kontinuasaun husi aseitasaun ba kandidatura Timor-Leste ba instituisaun finanseira internasionál ne’e no halo parte iha obrigasaun lubun ida ne’ebé país ne’e tenke halo tuir molok ofisializasaun adezaun nian.
Asinatura ba protokolu kooperasaun nian iha infraestrutura obras públikas nian, urbanizmu no dezenvolvimentu rejionál no urbanu, entre Ministériu Obras Públikas, Transportes no Komunikasoins Repúblika Demokrátika Timor-Leste nian no Ministériu Obras Públikas no Urbanizmu Repúblika Indonézia nian hetan ona aprovasaun. Protokolu ne’e mai atualiza Memorandu Entendimentu ne’ebé asina ona iha tinan 2011 no 2015, iha área kooperasaun iha infraestrutura obras públikas nian.
Liuhusi proposta Primeiru-Ministru nian, hetan ona aprovasaun rejime remuneratóriu ba órgaun dirijente sira Konsellu Administrasaun Sentru Nasionál Chega nian! ne’ebé determina valór sira iha relasaun ho remunerasaun no seña prezensa nian sira, tanba haree ba responsabilidade no sensibilidade matéria sira ne’ebé fó ona ba Sentru ne’e.
Ministru Obras Públikas, Transportes no Komunikasoins, ne’ebé akompaña husi Komisaun Nasionál Aprovizionamentu (husi Ministériu Planeamentu no Investimentu Estratéjiku), aprezenta ona ba Konsellu Ministrus rezultadu husi prosesu negosiasaun kona-ba operasaun no manutensaun sentrál elétrika sira Hera no Betanu nian.
Ministériu Finansas, hamutuk ho Diresaun-Jerál Tezouru nian, halo pontu situasaun ida kona-ba ezekusaun Orsamentu Jerál Estadu nian ba tinan 2017, ne’ebé foka liu ba atividade prinsipál sira ne’ebé hala’o ona iha trimestre dahuluk tinan ida ne’e, ba rezumu husi dadus pagamentu sira tinan 2016 no 2017 nian, iha avaliasaun ida kona-ba pagamentu hirak ne’ebé halo ona iha munisípiu sira no ba dezafiu prinsipál sira ne’ebé hasoru ona iha prosesu ezekusaun orsamentu nian.
Ministériu Administrasaun Estatál aprezenta ona kalendáriu operasaun sira resenseamentu eleitorál nian ba atualizasaun kadernu eleitorál sira, haree ba eleisaun parlamentár tinan ida ne’e nian. Resenseamentu ne’e sei hala’o husi loron 8 fulan-abríl to’o loron 26 fulan-maiu. Lista provizória eleitór sira nian sei fó-sai husi loron 29 fulan-maiu to’o loron 5 fulan-juñu, ba konsulta no korresaun. Lista finál sira sei fó-sai iha loron 8 fulan-juñu iha Jornál Repúblika.
Komisaun Interministeriál ba aplikasaun estratégia investimentu nian ba jestaun kona-ba fo’er sira ne’ebé isin sidade Dili nian, ne’ebé lidera hosi Ministériu Administrasaun Estatál, aprezenta ona ba Konsellu Ministrus proposta finansiamentu ida ba asaun hirak ne’ebé mak envolve. Mosu sujestaun barbarak, ne’ebé sei hetan iha elaborasaun dokumentu ne’ebé sei hato’o ba Konsellu Ministrus ida oinmai. REMATA
