Iha loron 3 fulan-abríl liubá, Ministru Estadu, Koordenadór Asuntus Ekonómikus no Ministru Agrikultura no Peskas, Estanislau Aleixo da Silva, akompãna husi ninia Vise-Ministru, Marcos da Cruz, partisipa iha serimónia entrega motorizada ba funsionáriu sira Diresaun-Jerál Pekuária no Veterinária (DJPV) nian, iha Komoro, Dili.

Ida ne’e hanesan ba dahuluk maka Governu, liuhusi DJPV, realiza inisiativa ida ne’e, ho ninia objetivu mak atu hatán ba nesesidade loro-loron asitente tékniku sira Pekuária no Veterinária nian, iha implementasaun programa no atividade sira Diresaun-Jerál ne’ebá nian. Programa vasinasaun no tratamentu ba balada sira nu’udar programa ne’ebé importante tebes, ne’ebé buka atu hamenus kazu sira moras nian iha munisípiu 12 no iha Rejiaun Espesiál Oekusi Ambenu.

Motorizada hirak ne’ebé entrega ona ne’e maka Honda Mega-Pro 150cc hamutuk 68 no Honda Supra X125 hamutuk 4.

Atu garante katak motorizada sira ne’e sei utiliza ba nesesidade serbisu nian, funsionáriu sira asina ona deklarasaun ida ne’ebé bele uza iha kazu sira ne’ebé presiza atu foti medida legál nian sira karik iha uzu ne’ebé  la loos.

Marka prezensa iha eventu ida ne’e kuadru no funsionáriu sira hosi Ministériu Agrikultura no Peskas.