Soru-mutu Konsellu Ministru iha loron 19 fulan Agostu tinan 2009
GOVERNU KONSTITUSIONAL IV
SEKRETARIA ESTADU KONSELLU MINISTRUS
KOMUNIKADU IMPRENSA
Soru-mutu Konsellu Ministrus loron 19 fulan Agostu tinan 2009
Konsellu Ministrus hala’o soru-mutu iha Kuarta-feira, loron 19 fulan Agostu tinan 2009, iha Sala Sorumutu Konsellu Ministrus nian, iha Palásiu Governu, iha Díli, no aprova tiha ona:
1. Dekretu-Lei ne’ebé aprova Rejime Remuneratóriu ba membru Komisaun Anti-Korupsaun
Dekretu-Lei ida ne’e, ne’ebé ohin aprova tiha ona iha Sorumutu Konsellu Ministrus, estabelese remunerasaun ba membru sira Komisaun Anti-Korupsaun.
Nune’e, Komisáriu ba Komisaun Anti-Korupsaun sei simu fulan-fulan osan dólar amerikanu $ 4.000.00,-(rihun hat) no Komisáriu Adjuntu osan dólar amerikanu $ 3.500.00,-(rihun tolu atus lima). Kona-ba subsídiu, Konsellu Ministrus deside tiha ona katak membru Komisaun, bainhira halo deslokasaun servisu, iha direitu ba subsídiu ida ba hahan no hela fatin hanesan ho membru Parlamentu Nasionál ida.
2. Proposta Lei Kontra Violénsia Doméstika
Estadu mak iha kbit atu harii sistema prevensaun ida ho fim atu halakon ka hamenus kauza vida sosiál ka família sira nian, ne’ebé halo violénsia doméstika, fó tulun ba família sira no ba ema sira ne’ebé hasoru situasaun risku ka tensaun no previni hamosu hahalok violénsia ba família sira ne’ebé iha sira nia let iha tensaun, atu nune’e bele hamenus efeitus hirak ne’e.
Ho forma ida ne’e, Proposta Lei haree atu implementa medida ne’ebé iha efeitu diak liu atu previni no promove direitu no apoiu, nune’e mós protesaun legál, ba vítima /sobrevivente violénsia doméstika, tuir kovensaun Direitu Humanu Internasionál.
3. Rezolusaun ne’ebé mak aprova projektu rua konabá empreendimentu
Rezolusaun ne’ebé mak aprova projektu rua konabá empreendimentu, ida iha Tasi Tolu no seluk iha Díli. Atu bele hala’o prosesu hirak negosiasaun nian, mak hili ona Vise-Primeiru-Ministru koordenador Asuntu hirak konabá jestaun ba Administrasaun Estadu nian, Sr. Eng.o Mário Viegas Carrascalão.
