Governu felisita Polísia Nasionál Timor-Lorosa’e ba nia tinan da-17
Ministru Estadu no Prezidénsia Konsellu Ministru no
Portavós ofisiál Governu Timor-Leste
Díli, loron 27 fulan-marsu tinan 2017
Governu felisita Polísia Nasionál Timor-Lorosa’e ba nia tinan da-17
Governu partisipa iha komemorasaun tinan da-17 Polísia Nasionál Timor-Leste (PNTL) nian, iha loron 27 fulan-marsu, iha Sentru Formasaun Polísia, iha Komoro, Dili. Selebrasaun sira ne’e, ho nia tema “Aniversário dos 17 anos da PNTL no garante da Lei, da Ordem e da Democracia em Timor-Leste” [Selebrasaun tinan da-17 PNTL nian iha nia knaar atu garante Lei, Orden no Demokrasia iha Timor-Leste], inklui mós parada ida, anúnsiu kona-ba promosaun sira, fó kondekorasaun no diskursu husi Prezidente Repúblika no husi Komandante-Jerál. Iha serimónia ne’e, hala’o mós omenajen ida ba antigu membru sira instituisaun ne’e nian, iha Monumentu ba Martir sira PNTL ninia oin.
Primeiru-Ministru, Rui Maria de Araújo, no Ministru Interiór, Longuinhos Monteiro, hamutuk ho Prezidente Repúblika, Prezidente Parlamentu Nasionál no Prezidente Tribunál Rekursu, Xefe Estadu Forsa Armada sira no na’i-ulun sira seluk, hato’o felisitasaun ba responsavel PNTL nian, Komandante-Jerál Júlio da Costa Hornay, no ba pesoál sira hotu daudaun ne’e nian no uluk nian husi instituisaun ne’e.
Governu Konstitusionál VI serbisu maka’as ona to’o oras ne’e atu asegura polísia nasionál ida ne’ebé profisionál liután no iha ekipamentu di’ak, ne’ebé haree liu ba-iha modelu polisiamentu komunitáriu ida. Aplikasaun Planu Estratéjiku PNTL nian ba tinan 2014-2018 hatudu ba modelu ida-ne’e, ne’ebé hatuur iha “Vizibilidade, Envolvimentu no Profisionalizmu” – pilár tolu ne’ebé forma akrónimu VIP, hodi reflete importánsia ne’ebé fó ba ema, profisionál sira no komunidade. Planu ne’e define dalan loloos ida ba reforma no dezenvolvimentu kontínuu PNTL nian, ne’ebé liga ba melloria operasionál sira ba manutensaun seguransa, orden públika no dame nian.
Durante lejizlatura ida ne’e, PSIK – Polísia Sientífika Investigasaun Kriminál konsolida tiha ona hanesan organizmu sientífiku ida ba servisu aplikasaun lei nian, ho formasaun iha área sira hanesan terrorizmu, siberkrime (krime internet nian), halo osan falsu, tráfiku umanu no halo dokumentu falsu sira. Hetan ona aprovasaun lejizlasaun ne’ebé atribui ba PNTL no ninia organizmu oioin babelek (kapasidade) atu hatán ba ameasa sira ne’ebé maihusi mundu ida ne’ebé globalizadu liután.
Maturidade no babelek PNTL nian ne’ebé sa’e ba beibeik, la husik liu leet de’it husi observadór no komentadór sira ne’ebé ko’alia kona-ba eleisaun Prezidensiál sira foin daudaun ne’e.
Portavós Governu nian, Ministro Estadu Agio Pereira, hatutan tan “orgullu ne’ebé Governu iha ho babelek no profisionalizmu ne’ebé sa’e ba beibeik husi ita-nia Forsa Polísia nian no sauda feto no mane hotu-hotu ne’ebé hala’o knaar atu defende Lei no Orden no iha sira-nia serbisu ba Nasaun.” REMATA
