Soru-mutu Estraordinária Konsellu Ministru iha loron 14 fulan Agostu tinan 2009
GOVERNU KONSTITUSIONÁL IV
SESKRETARIA ESTADU KONSELLU MINISTRUS
KOMUNIKADU IMPRENSA
Soru-mutu Estraordinária Konsellu Ministrus nian loron 14 fulan Agostu tinan 2009
Konsellu Ministrus hala’o Soru-mutu iha loron sesta ida ne’e, loron 14 fulan Agostu tinan 2009, iha sala Soru-mutu Konsellu Ministrus nian, iha Palásiu Governu, iha Dili, no aprova:
1. Proposta Lei kona-ba Orsamentu no Jestaun Finanseira
Iha sesaun estrordinária husi Soru-mutu Konsellu Ministrus ohin nian halo aprovasaun ba Proposta Lei kona-ba Orsamentu no Jestaun Finanseira.
Antes ne’e vigora Regulamentu UNTAET 2001/13 no ba ida ne’e mosu nesesidade atu halo adaptasaun ba sistema jurídiku timor nian ne’ebé ho forma sivilista. Governu Konstitusionál IV presiza halo revizaun ba Regulamentu ne’e hodi adapta nia ba realidade atuál país nian, tanba urjente atu introdús mekanizmu jurídiku sira ba kaptasaun no afetasaun husi rekursu finanseiru hirak ne’ebé esensiál ba dezenvolvimentu Timor-Leste nian. Iha revizaun ne’e konta hó dezenvolvimentu país nian ne’ebé sustentadu no integradu, jestaun ba finansa públika sira ho rigór no transparénsia, sustentabilidade ba konta públika sira ba prazu naruk no asegura ekonomia ida ne’ebé kompetitiva ne’ebé kredibiliza Estadu ba populasaun no komunidae internasionál.
Alterasaun hirak hó karater materiál mak hanesan, ho forma jerál, kona-ba konsagrasaun ba prinsípiu fundamentál sira kona-ba finansa públika sira, dívida públika, konta bankária ofisiál sira, prazu ba aprezentasaun ba proposta Lei kona-ba Orsamentu Estadu nian, fundu espesiál sira, transferénsia sira, relatóriu sira, eliminasaun ba perda ka obrigasaun sira no responsabilidade.
Nune’e, lei ida ne’e estabelese dizpozisaun jerál no komún sira kona-ba enkuadrametu husi Orsamentu Estadu nian; regra no prosedimentu ne’ebé iha relasaun hó organizasaun, elaborasaun, aprezentasaun no ezekusaun husi Orsamentu Estadu nian no fiskalizasaun ho responsabilidade ne’ebé korespondente; regra no prosedimentu hirak ne’ebé iha ligasaun ho garantia no empréstimu hirak ne’ebé Estadu fó no simu, regra hirak ne’ebé iha relasaun ho organizasaun, elaborasaun no aprezentasaun kona-ba relatóriu anuál husi Konta hirak estadu nian no regra ho prosedimentu hirak ne’ebé atu aplika iha jestaun Finanseira Estadu nian.
