Governu, liuhusi Sekretaria Estadu ba Apoiu no Promosaun Sósiu-Ekonómiku ba Feto, selebra Loron Internasionál Feto nian ho tema “Feto nia Serbisu ba Dezenvolvimentu” iha Postu Administrativu Ba’agia, Munisípiu Baukau, iha loron 9 fulan-marsu tinan 2017.

Sekretária Estadu ba Apoiu Promosaun Sósiu-Ekonómiku ba Feto, Veneranda Lemos Martins, iha nia diskursu hateten: “ita selebra Loron Internasionál Feto nian tanba mundu tomak fó rekoñesimentu ba feto nia papél hanesan inan, edukadora no jestora, iha família no iha sosiedade.”

Mundu internasionál hakarak atu apresia no valoriza feto hotu-hotu iha mundu tomak nia partisipasaun iha setór saida de’it, maibé iha Timor ita hakarak atu valoriza ita-nia feto maluk sira, ita-nia eroína sira, bei’ala sira ne’ebé maka husik hela aten-barani ida ne’e atu feto Timor-Leste bele kontinua nia mehi ba dezenvolvimentu nasaun nian”, Veneranda Lemos hatutan.

Iha fatin hanesan, Prezidente Autoridade Munisípiu Baukau nian, António Guterres, dehan: “Iha Munisípiu Baukau, estrutura suku nian barak liu feto mak okupa, ida ne’e hatudu katak sentidu atu promove feto iha Suku, Aldeia no Postu Administrativu hahú la’o di’ak ona”,

Marka prezensa iha selebrasaun ne’e maka Sekretária Estadu Arte no Kultura, Maria Isabel de Jesus Ximenes, Komandante Polísia Munisípiu Baukau, Administradór Postu Administrativu Ba’agia no mós komunidade sira.