Ministériu Solidariedade Sosiál (MSS), liuhosi, Diresaun Nasionál Dezenvolvimentu Sosiál (DNDS), liuliu Departamentu Protesaun no Promosaun Feto nian, selebra Loron Internasionál Feto nian ne’ebé monu iha loron 8 fulan-marsu ho tema “aten brani ba transformasaun servisu feto nian iha setór hotu-hotu”.

Hafoin selebrasaun ne’e, Vise-Ministru Solidariedade Sosiál, Miguel Marques Gonçalves “Manetelu”  hateten katak inisiativa husi feto sira iha MSS nian atu komemora Loron Loron Internasionál Feto nian. Ida ne’e hanesan reflesaun ida kona-ba partisipasaun feto sira nian iha prosesu konstrusaun Estadu, liuliu iha instituisaun públika ida ne’ebá, hodi avalia oinsá sira bele transforma sira nia an iha serbisu hotu-hotu iha ne’ebé sira haknaar an ba.

Miguel “Manetelu” dezafia ona feto sira MSS nian atu kandidata an ba kargu xefia sira: “Iha Ministériu ida ne’e, iha mós kargu xefia barak, maibé iha deit feto na’in 6 maka hanesan Xefe Departamentu no Diretora. Atu prienxe kargu hirak ne’e, sira hotu tenke tuir kompetisaun.”

Fó hanoin mós katak feto Timor sira hatudu ona sira-nia kapasidade xefia nian, hahú kedas husi tempu ita-nia beiala sira nian. Iha fatin balu, feto okupa fatin hanesan liurai, maske lisan limita partisipasaun feto nian atu hola desizaun sira, tantu iha uma laran, hanesan mós iha komunidade. Aleinde ne’e, iha funu ba Libertasaun hahú kedas iha tinan 1975, feto sira hatudu ona sira nia aten-barani hasoru invazór sira.

Entretantu reprezentante funsionária sira MSS nian, Antónia Carmen da Cruz, hateten katak “Loron Mundiál Feto nian selebra ohin atu hanoin hikas fali kona-ba feto nia luta ba direitu igualdade iha família, iha servisu fatin, iha vida ekonómika no mós iha kultura. Feto kontinua luta ba direitu igualdade, ne’e maka luta naruk ida.”

Antónia Carmen da Cruz hateten kada tinan, iha loron ne’e, ita hanoin ba feto sira ne’ebé maka seidauk hatene hakerek no lee no sira nia ekonomia seidauk  sufisiente. Luta ida ne’e sei kontinua nafatin to’o feto sira iha Timor-Leste, ne’ebé kompostu husi metade populasaun ne’e nian, bele moris di’ak ona no iha dignidade hanesan ho mane sira.

Atividade ne’e hala’o iha salaun edifísiu sentrál MSS nian iha Kaikoli, iha Dili. Partisipa iha selebrasaun ne’e maka Direto-Jerál Protesaun Sosiál  Antigu Kombatente Libertasaun Nasionál (PSAKLN), Eugénio João Amado de Maria Soares, Diretór Nasionál Dezenvolvimentu Sosiál, Florenço Pina Dias Gonzaga, Diretora Nasionál Rejime Kontributivu Seguransa Sosiál, Aida Maria Mota, Xefe Departamentu sira, nune’e mós asesór nasionál no estranjeiru sira.