Governu Timor-Leste

Ministru Estadu no Prezidénsia Konsellu Ministru no

  Portavós ofisiál Governu Timor-Leste

 Díli, loron 28 fulan-fevereiru tinan 2017

Fuga Informasaun husi relatóriu prejudika knaar ho Komisaun Likidasaun Dívida nian sira

Iha semana liubá ajénsia notisioza Portugál nian, LUSA, fó sai ona relatóriu alegadu ida ne’ebé halo husi Komisaun Eventuál Parlamentu Nasionál ba Supervizaun no Akompañamentu Prosesu Likidasaun Dívida sira Estadu nian, ne’ebé ikusmai sai hanesan objetu husi notísia sira. Divulgasaun ida ne’e hala’o molok Governu iha biban hodi lee relatóriu ne’e, haree fila-fali nia númeru no rekomendasaun sira ka troka informasaun ho Komisaun ne’e kona-ba konteúdu dokumentu ne’e nian.

Governu valoriza knaar komisaun ida ne’e nian, ne’ebé harii bazeia ba Rezolusaun Parlamentu Nasionál n.12/2016, loron 10 fulan-agostu tinan 2016, ne’ebé define responsabilidade sira no ámbitu husi nia mandatu. Governu serbisu hamutuk ona ho Komisaun ne’e no hein hela ho espetativa atubele iha asesu formál ba konteúdu relatóriu ne’e nian.

Bazeia ba mandatu Komisaun ne’e nian, ne’ebé remata ona iha loron 31 fulan-janeiru tinan 2017, komisaun ne’e iha kompeténsia ida espesiál atu akompaña no fiskaliza prosesu apuramentu kona-ba dívida sira husi tinan sira anteriór ne’ebé tenke selu iha ámbitu programa sira investimentu nian ne’ebé inklui iha Orsamentu Retifikativu ba tinan 2016 nian; identifika risku sira ne’ebé envolve iha jestaun projetu no kontratu nian sira ne’ebé hamosu situasaun sira kona-ba kustu adisionál sira iha projetu no obra nian sira ne’ebé tama iha programa Fundu Infraestrutura nian sira, ne’ebé hala’o ona iha tinan 2016; no ikusliu, propoin ba Plenáriu Parlamentu Nasionál nian medida sira ne’ebé presiza atu asegura kumprimentu lei, hanesan rezultadu husi verifikasaun ba prosesu kompensasaun no likidasaun dívida sira nian, ne’ebé Governu mak atu hala’o.

Ministériu Obras Públikas,Transportes no Komunikasoins haruka ona kópia husi dokumentu hotu-hotu ne’ebé Komisaun ne’e husu,  ne’ebé uluk legalmente Ministériu ne’e maka rai, no halo parte ba Komisaun ne’e nia mandatu. Aleinde ne’e, Governu rasik fó ona esklaresimentu kle’an, liuhusi Ministru Obras Públikas, Transportes no Komunikasoins no Vise-Ministru Finansas, no mós funsionáriu nivel aas sira husi Administrasaun Públika.

Portavós, Ministru Estadu Agio Pereira, hateten katak “serbisu Komisaun ne’e nian no prosesu resposta nian ba relatóriu ne’e hanesan kestaun governasaun di’ak nian ida, ne’ebé maka prepara diálogu ida produtivu. Interrupsaun iha prosesu ne’e ho fuga informasaun no Komunikasaun Sosiál fó-sai kedas, nu’udar buat ne’ebé maka triste tebes. Governu sei la halo espekulasaun kona-ba relatóriu ida ne’ebé nia la iha biban atu haree fila-fali no nia sei fó atensaun tomak ne’ebé maka presiza bainhira  simu relatóriu ne’e formalmente.” REMATA