Ministru Estadu no Prezidénsia Konsellu Ministru no

  Portavós ofisiál Governu Timor-Leste

 Dili, loron 27 fulan-fevereiru tinan 2017

Governu inaugura Institutu Politékniku dahuluk iha Tasi Mane

Iha loron 23 fulan-fevereiru, Primeiru-Ministru, Rui Maria de Araújo, inaugura ona Institutu Politékniku Betanu, iha Munisípiu Manufahi.  Ida ne’e hanesan estabelesimentu Ensinu Superiór  nian dahuluk ne’ebé harii diretamente husi Governu no sei apoia prestasaun edukasaun téknika nian, liu-liu iha área Agrikultura, Pekuária no Enjeñaria, atubele kapasita foin-sa’e timoroan sira ba atividade profisionál nian sira.

Primeiru-Ministru timoroan ne’e, iha nia diskursu ba dosente, estudante no funsionáriu sira, hateten katak Governu fiar katak investimentu iha Edukasaun no Formasaun tulun harii sosiedade ida ne’ebé forte, no katak abertura Institutu ida ne’e nian marka tan pasu ida atu prepara foin-sa’e timoroan sira hodi partisipa ho forma efetiva iha dezenvolvimentu nasionál.

Hein katak tinan ida ne’e, estudante na’in 200 resin maka bele tama iha kursu Produsaun Animál no Konstrusaun Sivíl. Kursu sira seluk ne’ebé maka prepara hela maka hanesan Enjeñaria Mekánika, Enjeñaria Elétrika, Alimentasaun no Produtu Agríkola sira, Saúde Animál nian no Silvikultura.

Institutu Politékniku Betanu ne’e harii liuhusi dekretu ne’ebé aprova tiha ona iha Konsellu Ministrus iha fulan-setembru tinan 2016. Hahú husi ne’e maka hahú harii edifísiu, define kurríkulu sira, rekruta profesór sira no pesoál administrativu, no hetan  ekipamentu sira ne’ebé presiza atubele hahú aula sira.

Planu Estratéjiku Dezenvolvimentu 2011-2030 rekoñese katak nasaun presiza “institutu politékniku sira atu oferese ensinu tékniku superiór ne’ebé mak espesífiku ba nesesidade dezenvolvimentu Timor-Leste nian”. Programa Governu nian mós ko’alia kona-ba promosaun “setór politékniku no universidade nian ida ne’ebé efisiente”, ne’ebé fó ba alunu sira “biban atu simu edukasaun ida ho kualidade no partisipa iha konstrusaun ita-nia país nian.”

Portavós, Ministru Estadu Agio Pereira, haksolok ho abertura Institutu Politékniku ida ne’e nian, hodi hateten katak “ninia lokalizasaun iha Manufahi, iha parte tasi-mane, hatudu momoos ita-nia polítika desentralizasaun servisu nian. Governu felisita sira hotu ne’ebé mak envolve ona no dezeja, serbisu di’ak ba pesoál dosente no estudante sira, ba fulan hirak oinmai,”. REMATA