Governu halo investigasaun hafoin halo tiha inspesaun ba ro’o peska
Ministru Estadu no Prezidénsia Konsellu Ministru no
Portavós ofisiál Governu Timor-Leste
Dili, loron 17 fulan-fevereiru tinan 2017
Governu halo investigasaun hafoin halo tiha inspesaun ba ro’o peska
Timor-Leste fó importansia boot ba iha ita nia rekursu tasi laran, ba iha sustentabilidade rezervas piscícola no ba prezervasaun espésies protejidas. Governo rekoñese mós importánsia hodi respeita termu akordu peska nian, hanesan aspeto importante no positivu ba ita nia dezenvolvimentu nasional no diversifikasaun ekonómika.
Agora dadaun, iha ona ro 15 husi xina ne’ebé hetan ona autorizasaun hodi hala’o atividade peska iha tasi timor nian, ho kondisoens espesífiku no limitasaun tuir lejislasaun timor nian. Lisensa ba atividade ro sira ne’e nian fó sai husi Ministériu Agrikultura no Peska, no validade hahú husi loron 15 fulan Novembru to’o loron 15 fulan Novembru 2017.
Hahú husi loron 9 to’o 12 fulan Fevereiru 2017, Diresaun Nasional Inspesaun Peskas hala’o inspesaun rutina ida ba ro 15 ne’e iha Portu Caravela, Baucau. Iha inspesaun ne’e nia laran deteta katak ro sira ne’e tula ikan tubaraun besik tonelada 43, ne’ebé maka bele viola lei Timor-Leste no termu lisensa peska nian ne’ebé maka fó sai ona husi Ministériu Agrikultura no Peska.
Hatan ba kestaun ne’e, maka Governu, liu husi Ministériu Agrikultura no Peska, hala’o hela prosedimentu hodi bele hetan evidênsia ne’ebé forte kona ba violasaun lei ka ba kondisaun ne’ebé maka estipula tiha ona.
Estabelese tiha ona Grupu Traballu ida ho reprezentantes husi Ministériu Agrikultura no Peskas, Diresaun Jeral Alfândega, Komponente Naval F-FDTL, Unidade Polisia Maritima PNTL, Servisu Investigasaun Kriminal PNTL, Servisus Imigrasaun, Ministériu Interior no Gabinete Primeiru-Ministru hodi hala’o investigasaun klean liu tan. Husi resultadu investigasaun hirak ne’e, maka Governu sei foti medidas tuir lei no kondisaun lisensa Timor-Leste nian.
Tuir Lei Timor-Leste nian, Ministru Agrikultura no Peskas iha kompetensia eskluziva atu hola “medida seluk” inklui denda no suspensaun ka bele mós revoga tia lisensa peska ne’e nian.
Liu husi porta voz Governu nian, Ministru do Estadu Agio Pereira hatete katak: “Governu sei lao tuir prosesu hodi bele asegura katak sira ne’ebé maka hetan lisensa sei hala’o atividades lolós hodi nune’e bele garante ekilibriu direitu titulares lisensa sira nian nune mós sira nia responsabilidade hodi respeita termu lisensa ne’ebé maka fó ba sira no tuir lei Timor-Leste nian. REMATA
