Governu fó omenajen ba Sir Elihu Lauterpacht
Ministru Estadu no Prezidénsia Konsellu Ministru no
Portavós ofisiál Governu Timor-Leste
Dili, loron 10 fulan-fevereiru tinan 2017
Governu fó omenajen ba Sir Elihu Lauterpacht
Ho laran triste tebes maka Governu Timor-Leste simu notísia kona-ba Señor Elihu Lauterpacht ninia mate, iha loron 8 fulan-fevereiru tinan 2017. “Sir Eli” hanesan figura markante ida iha Direitu Internasionál, ho karreira famozu ida, iha tinan 60 resin nia laran, tantu iha profisaun ne’ebé nia hala’o nune’e mós iha meiu akadémiku.
Governu hato’o ninia kondolénsia ba familía “Sir Eli” nian no ba ninia belun sira, liuliu ba Lady Catherine Lauterpacht, ninia oan mane Michael no Connor no mós ba nia oan feto Gabrielle no Deborah.
Elihu Lauterpacht moris iha Cricklewood, Londres, iha loron 13 fulan-jullu tinan 1928, oan husi Hersch no Rachel Lauterpacht. Ninia aman, matebian Sir Hersch, hala’o knaar importante ida no pioneiru bainhira mosu sistema modernu kona-ba direitu internasionál, liman-rohan ne’ebé “Sir Eli” kontinua no fó onra liuhusi ninia serbisu no liuhusi harii Sentru Direitu Internasionál Lautherpacht iha Universidade Cambridge.
Sir Elihu estuda iha Trinity College iha Cambridge. Tama iha Orden ne’e iha tinan 1950, hetan nomeasaun hanesan Konselleiru Liurai-Feto nian iha tinan 1970. Iha ninia área espesializasaun nian, Direitu Internasionál, nia serbisu hanesan advogadu, konselleiru no juíz. Nia sai mós hanesan katedrátiku no Profesór Onoráriu Direitu Internasionál nian iha Universidade Cambridge.
Iha interventasaun barak iha Tribunál Internasionál Justisa nian ne’ebé Sir Elihu halo maka reprezenta Timor-Leste iha kazu “Kestaun kona-ba hadau no detensaun dokumentu no dadus balun”, ne’ebé inklui audiénsia públika iha Haia iha fulan-janeiru tinan 2014. Iha tinan barak nia laran, nia akonsella Governu Timor-Leste iha asuntu hirak ne’ebé maka relasiona ho Direitu Internasionál no hala’o serbisu maka’as duni atu hetan rezultadu ne’ebé justu ba ita-nia nasaun.
Portavóz Governu nian, Ministru Estadu Agio Pereira, hateten katak “Sir Eli hanesan ema ida ne’ebé koñesidu tebes-tebes. Nia ne’e ema ne’ebé maka defende lei maka’as tebes, nu’udar hanoin ida ne’ebé mós maka nabilan iha mundu. Nia mós sempre sai hanesan kavalleiru loloos ida, simpátiku no laran-di’ak. Governu la haluha ninia domin ba justisa, ninia kontribuisaun ne’ebé boot tebes ba dezenvolvimentu Direitu Internasionál nian no ninia atividade ne’ebé konstante ba tratamentu ne’ebé justu ba Timor-Leste. Hanesan onra boot ida bainhira ema hanesan nian serve mós ita-nia país no nia ho Lady Cathy Timor-Leste sei konsidera nafatin hanesan belun di’ak ida”. REMATA
