Falintil – Forsa Defeza Timor-Leste nian (F-FDTL) komemora aniversáriu ba da-XVI iha Kuartél-Jenerál, iha Fatuhada, Dili, iha loron 2 fulan-fevereiru tinan 2017.

Prezidente Repúblika, Taur Matan Ruak, saúda militár no sivíl sira ne’ebé loro-loron, ho dedikasaun no esforsu maka’as, serbisu iha F-FDTL, hodi serbí nasaun.

Ida-ne’e ha’u-nia diskursu ikus nu’udar Komandante Supremu Forsa Armada. Ha’u-nia diskursu ne’e dirije ba ema ne’ebé serbí ba instituisaun militár ne’e, tanba ha’u rasik iha orgullu atu serbí no dedika ha’u-nia an ba nia. Hanesan onra no priviléjiu boot tebes ida mai ha’u, atu partisipa iha serimónia ne’ebé iha signifikadu boot tebes ida ba timoroan hotu”, afirma Taur Matan Ruak.

Xefe Estadu hatete katak tinan daudaun ne’e nu’udar konsolidasaun demokrasia nian: “Ha’u hakarak atu husik hela ha’u-nia apresu ba F-FDTL sira ne’ebé halo tuir desizaun polítika sira ho fuan-hakmatek  no hatudu nivel profisionalizmu ne’ebé aas, maturidade demokrátika, respeitu institusionál no sentidu servisu ba Timor-Leste. Ha’u nafatin fó atensaun ba imi iha asuntu hirak ne’ebé iha relasaun ho instituisaun militár no nafatin sai solidáriu ho família militár ne’ebé ha’u pertense ba.”

Iha sorin seluk, Xefe Estadu Estadu-Maiór Jenerál Forsa Armada nian, Lere Anan Timur, afirma katak komemorasaun ne’e marka pájina signifikativa foun ida iha istória no dezenvolvimentu Forsa Defeza nian.  F-FDTL harii iha tinan 2001, atu halo tuir orden no konstituisaun. Hanesan forsa dixiplinada, treinada no prontu atu hala’o nia knaar sira ho di’ak, nafatin disponivel, rasionál no adekuada ba nesesidade sira nasaun nian, ho orsamentu sustentável ida, atubele hala’o misaun sira defeza no vijilánsia nian, kontrolu territóriu nasionál no espasu marítimu.

Iha ámbitu komemorasaun ne’e nian, Prezidente Repúblika kondekora ho Medalla Méritu Timor-Leste nian ba Xefe Estadu-Maiór Jenerál Forsa Armada nian, Lere Anan Timor, ne’ebé dedika ona nia moris tomak ba pátria ne’e. Tanba ne’e, nia tenke sai hanesan inspirasaun ida ba jerasaun oinmai.

Partisipa iha serimónia ne’e Primeiru-Ministru, Rui Maria de Araújo, membru sira Governu nian, Parlamentu Nasionál, Korpu Diplomátiku no komponente Forsa Defeza Timor-Leste nian.