Governu kumpri promesa sira ho infraestrutura
Ministru Estadu no Prezidénsia Konsellu Ministru no
Portavós ofisiál Governu Timor-Leste
Dili, loron 8 fulan-fevereiru tinan 2017
Governu kumpri promesa sira ho infraestrutura
Inaugurasaun foun ba Ospitál Rejionál Eduardo Ximenes, iha Baukau, no inaugursasaun ba edifísiu prinsipál Komisaun Nasionál Eleisaun nian (CNE-sigla iha lia-portugéz), hatudu katak remata ona projetu infraestrutura importante rua ne’ebé presiza hodi apoia servisu esensiál sira iha Timor-Leste.
Ospitál Rejionál, ne’ebé maka lori naran Vise-Ministru Saúde Governu Unilaterál nian iha tinan 1975, sei serbi ba Munisípiu Baukau no munisípiu viziñu sira hanesan Vikeke, Manatutu no Lautén. Durante serimónia inaugurasaun, iha loron 20 fulan-janeiru, Vise-Ministra Saúde, Ana Isabel Soares, hatete katak kontinuasaun ba promesa Governu nian hodi tulun ba servisu sira oin-oin ospitál nian, iha área sira prevensaun no tratamentu, terapia no diagnóstiku, internamentu no emerjénsia. Unidade importante Saúde Rejionál ne’ebá nian daudaun ne’e iha funsionáriu sira na’in-227, inklui médiku no espesialista sira na’in-25, enfermeiru sira na’in-98 no parteira sira na’in-22. Elementu hirak ne’e na’in-sanulu-resin-tolu maka membru Brigada Médika Kubana nian.
Inaugura ona mós ofisialmente iha tinan ne’e, edifísiu prinsipál Komisaun Nasionál Eleisaun nian hodi fó espasu ho kondisaun sira ne’ebé maka presiza hodi hala’o servisu importante kona-ba supervizaun, liuliu, kona-ba eleisaun sira oin-mai.Edifísiu ne’e, inaugura ona iha loron 28 fulan-janeiru husi Primeiru-Ministru, Rui Maria de Araújo, Ministru Planeamentu no Investimentu Estratéjiku, Kay Rala Xanana Gusmão, no Prezidente CNE, Alcino Baris, ne’ebé reprezenta investimentu ida iha traballu kontínuu Komisaun nian, atubele kumpri ninia mandatu hodi garante demokrasia iha Timor-Leste, liuhusi promosaun prosesu eleitorál sira livre no justu.
Iha inaugurasaun ne’e, Primeiru-Ministru hateten katak instalasaun sira ne’ebé ho kaulidade maka hanesan fatór importante hodi tulun ba institutisaun sira , atubele atinji ninia objetivu sira. No ko’alia mós kona-ba importásia ba rekursu umanu sira organizmu ne’e nian, hodi fó aten-barani ba funsionáriu sira hotu CNE nian hodi hala’o sira nia knaar ho dedikasaun no kontinuasaun iha dezenvolvimentu profisionál.
Portavós Governu Konstitusionál da-VI, Ministru Estadu Agio Pereira, observa ona katak “inaugurasaun husi infraestrutura rua ne’e maka nafatin sai nu’udar reflexu ida ba ita-nia progresu. Ospitál Rejionál iha Baukau no edifísiu prinsipál Komisaun Nasionál Eleisaun nian iha Díli iha knaar ida importante hodi fornese servisu ho kualidade ba povu iha Timor-Leste”. REMATA
