Ministru Estadu no Prezidénsia Konsellu Ministru no
Portavós ofisiál Governu Timor-Leste
Dili, loron 1 fulan-feveiru tinan 2017
Governu partisipa iha Konferénsia Internasionál kona-ba Luta hasoru Korrupsaun
Governu partisipa iha Konferénsia Internasionál kona-ba Luta hasoru Korrupsaun, ne’ebé organiza husi Komisaun Parlamentár Asuntu Konstitusionál, Justisa, Administrasaun Públika, Podér Lokál no Antikorrupsaun. Konferénsia ne’e ho nia tema “Kompromisu Parlamentu nian atu kombate hasoru korrupsaun – direitu, liberdade no garantia sira versus kombate hasoru korrupsaun”, hala’o iha Salaun Nobre Ministériu Negósiu Estranjeiru no Kooperasaun nian, iha loron 2 no loron 3 fulan-fevereiru.
Iha konferénsia ne’e, Ministru Estadu, Koordenadór Asuntu Administrasaun Estadu no Justisa nian no Ministru Administrasaun Estatál, Dionísio Babo Soares, sei hola parte iha debate ida kona-ba “Polítika Públika Prevensaun nian sira no Kombate hasoru Korrupsaun”. Nia mós maka sei taka sesaun Konferénsia ne’e.
Prezidente Komisaun governamentál ba Reforma Lejislativa no Setór Justisa nian, Jorge Manuel Ferreira da Graça, sei modera sesaun ida kona-ba “Definisaun responsablidade penál kona-ba titulár sira iha kargu polítiku nian sira no Konstituisaun Repúblika Demokrátika Timor-Leste nian“. Prezidente Komisaun Anti -Korrupsaun, Adérito Pinto Tilman, sei sai moderadór iha sesaun kona-ba “Kriminalizasaun iha enrikesimentu ilísitu no Konstituisaun Repúblika Demokrátika Timor-Leste”.
Entre partisipante sira Timor-Leste nian, inklui titulár sira kargu aas judisiál nian, Membru Parlamentu, advogadu no profesór universitáriu sira. Konvidadu internasionál sira husi Indonézia , Nova-Zelândia no Portugál nian sei hariku debate ne’e ho ninia prespektiva sira ne’ebé la hanesan. Orgnizadór sira iha objetivu jerál rua ba iha Konferénsia ne’e: dahuluk, “hodi reforsa interese sidadaun sira nian no insentiva determinasaun husi instituisaun sira ne’ebé kompentete iha prosesu foti desizaun nian no adosaun husi medida sira ne’ebé destinadu atu previne no foti asaun ne’ebé forte hasoru korrupsaun”., no daruak, “hasa’e nivel koñesimentu sidadaun sira nian kona-ba konteúdu Konvensaun Nasoins Unidas nian kontra Korrupsaun no nia relasaun ho orden jurídika nasionál”. Timor-Leste asina ona Konvensaun ne’e iha tinan 2003 no ratifika ona iha tinan 2009.
Portavós Governu nian, Ministru Estadu Agio Pereira, fó parabéns ba organizadór sira Konferénsia nian, hodi hateten katak “Governu ho laran kaman partisipa iha debate semana ne’e nian no simu ho haksolok ba biban ida ne’e hodi rona péritu sira oin-oin. Haka’as an hodi hamenus korrupsaun no hasa’e aas liu responsabilizasaun, transparénsia no governasaun ne’ebé di’ak, ne’e mak importante ba dezenvolvimentu Timor-Leste nian”. REMATA