Tinan 2017 hahú ho forma ne’ebé pozitivu tebes iha área Saúde nian. Munisipíu Baukau daudaun ne’e iha ona ospitál rejionál ida, ne’ebé sei fó mós benefísiu ba komunidade sira ne’ebé maka hela besik iha ne’ebá, liuliu iha Munisípiu Vikeke, Manatutu  no Lautein.

Naran Ospitál Rejionál Eduardo Ximenes ne’e, foti husi naran Vise-Ministru Saúde Governu Unilaterál tinan 1975 nian, ne’ebé, iha períodu invazaun Indonézia nian, ho espíritu nasionálizmu, patriotizmu no profisionálizmu nian, fó ona vida ba servisu libertasaun Povu Timor-Leste nian.

Durante inaugurasaun ne’e, Vise-Ministra Saúde, Ana Isabel Soares, fó hanoin katak konstrusaun unidade ospitál ida ne’e nian hahú iha tinan 2007, bainhira atuál Primeiru-Ministru, Rui Maria de Araújo, okupa kargu Ministru Saúde nian no Vise-Primeiru Ministru iha Governu Konstitusionál II. Vise-Ministra ne’e subliña katak faktu konstrusaun Ospitál Rejionál Eduardo Ximenes finaliza ona la signifika katak obrigasaun sira Governu nian ba unidade ospitál  ida ne’e mós para ona. Ho dalan ida ne’e, Ministériu Saúde nian sei fó apoiu ba servisu oin-oin kona-ba prevensaun no tratamentu, diagnóstiku no terapia, internamentu no urjénsia. Ana Isabel Soares garante katak ai-moruk sira sei la falta no rekursu umanu sei sufisiente atu atende nesesidade povu nian kona-ba Saúde.

Ospitál ne’e iha funsionáriu hamutuk na’in 227: enfermeiru na’in 98 no asistente na’in 12, parteira na’in 22, médiku na’in 25 no espesialista rua, no selukseluk-tan. Atu hateten katak iha ne’ebá iha mós elementu na’in 13 husi Brigada Médika Kuba nian.

Marka prezensa iha serimónia ne’e maka Ministru Obras Públikas, Transportes no Komunikasoins, Gastão de Sousa, membru Governu sira seluk, deputadu, entidade relijioza sira, Diretór Servisu Saúde Baukau nian, reprezentante husi Sosiedade Sivíl no komunidade, família Eduardo Ximenes nian no konvidadu sira seluk.