Munisípiu Manatutu haree ona kona-ba hadi’a ninia sistema irigasaun, liuhusi instalasaun foun sira ne’ebé mak inaugura ona iha Bulutu, iha loron 18 fulan-janeiru.

Governu timorense klasifika ona rejiaun ne’ebá hanesan área ida prioritária tebes, ho objetivu atu hasa’e produsaun fós nian, ne’ebé sei kontribui boot tebes ba seguransa ai-han no dezenvolve ekonomia iha país. Osan barak liu hetan husi Ajénsia Japoneza Kooperasaun Internasionál nian (JICA), Projetu Reabilitasaun no Hadi’a Sistema Irigasaun ne’e sei fó benefísiu besik  hektár 780 ba hare natar nian, ne’ebé pertense ba família 600, iha Laleia (Munisípiu Manatutu) no Vemasse (Munisípiu Baukau)

Projetu ida ne’e hahú hala’o iha fulan-novembru tinan 2014 no, aleinde kooperasaun téknika ida ne’e, ne’ebé hala’o entre Ministériu Agricultura no Peskas (MAP) no JICA, maka sei hala’o hela “Projetu Aumentu Renda husi Uma Kain sira liuhusi Fortalesimentu Fós Doméstiku nian”, ne’ebé hahú iha fulan-setembru tinan liubá  no sei termina iha fulan-setembru tinan 2021.

Marka prezensa iha serimónia inaugurasaun sistema irigasaun ne’e, husi Primeiru-Ministru, Rui Maria de Araújo, Ministru Agrikultura no Peskas, Estanislau da Silva, Embaixadór Japaun nian iha Timor-Leste, Eiji Yamamoto, no na’i ulun sira seluk.