Promosaun kuda ai-kameli
Fatin: Atabae, Munisípiu Bobonaru
Data: loron 13 fulan-janeiru tinan 2017
Diresaun Jerál Floresta, Kafé no Planta Industriál sira nian husi Ministériu Agrikultura no Peskas maka sai hanesan responsavel ba lansamentu kuda ai-kameli oan, ai-horis ne’ebé sai hanesan emblema nasionál.
Tanba iha valór ekonómiku ne’ebé aas, iha fulan-novembru tinan 2015, Konsellu-Ministrus aprova ona, Rezolusaun ida ne’ebé promove atividade kuda ai-kameli nian sira, atu nune’e bele regula ninia esplorasaun.
Ai-horis ida ne’e iha utilidade oin-oin, hanesan ekolójika, istórika, ekonómika, kulturál, terapéutika, ornamentál no to’o relijioza. Tanba haree buat hirak ne’e maka, iha polítika protesaun ambiente nian, ai-kameli sai nu’udar produsaun prioritária ida.
Atividade ne’e sei hahú iha oras tuku 8:00 no sei marka mós prezensa iha ne’ebá Primeiru-Ministru, Rui Maria de Araújo, no Ministru Estadu, Koordenadór Asuntu Ekonómiku no Ministru Agrikultura no Peskas, Estanislau da Silva.
