Primeiru-Ministru, Rui Maria de Araújo, akompaña husi Ministru Obras Públikas, Transportes no Komunikasoins, Gastão de Sousa, no ho ekipa ida husi Aeroportu Internasionál Prezidente Nicolau Lobato, dezloka ba Aeroportu ne’e, iha loron 14 fulan-dezembru liubá, hodi identifika no garante solusaun ida ba kauza sira husi inundasaun ne’ebé akontese ona iha loron ida antes.

Tanba sistema drenajen ne’ebé iha la konsege halo halai ho di’ak bee udan-been husi Kampung Baru, iha suku Komoro, aeroportu hetan inundasaun durante oras balun, tanba ne’e prejudika pasajeiru no funsionáriu sira.

Lori Governu nia naran, Rui Maria de Araújo husu deskulpa tanba akontesimentu ne’e no esklarese katak “inundasaun iha aeroportu, inklui iha zona sira ne’ebé besik, mosu tanba drenajen sira ne’ebé iha la funsiona 100% tanba nakonu ho fo’er”.

Bee udan-been husi Kampung Baru nian, tuir loloos, tenke suli ba mota Komoro liuhusi kanál sira ne’ebé eziste iha estrada ninin ne’ebé liuhusi Akademia PNTL no Ministériu Agrikultura no Peskas nian. Maibé kanál sira ne’e la funsiona ho efisiente iha tempu udan boot hirak ne’ebé tuun iha inísiu époka ida ne’e nian. 

Primeiru-Ministru garante ona katak Ministériu Obras Públikas no Komunikasoins, sei asegura katak kanál sira hotu sei funsiona ho di’ak, atu nune’e problema sira hanesan ne’e labele mosu tan. Aleinde ne’e, Governu buka daudaun ona solusaun ne’ebé adekuada liu atu previne inundasaun sira hanesan ne’e.