Iha loron 3 fulan-fevereiru tinan 2016, Konsellu Ministrus aprova ona Dekretu-Lei kona-ba Sistema Nasionál Área Protejida sira nian. Ho medida ida ne’e, harii ona instrumentu legál sira ne’ebé presiza ba protesaun natureza nian, ne’ebé importante tebes komunidade tradisionál sira-nia moris no atu habelar turizmu ekolójiku, nu’udar potensialidade boot ida mós ba dezenvolvimentu sustentavel Timor-Leste nian.

Governu, liuhusi Sekretária Estadu Komunikasaun Sosiál, dezenvolve ona vídeo ida, iha ne’ebé hatudu área balun ne’ebé hetan protesaun, hanesan ezemplu área illa Ataúru no Parké Nasionál Nino Konis Santana.

Totál Área Protejida ne’ebé iha maka 46, iha ne’ebé balun iha pezu simbóliku ida, hanesan Parké Nasionál Kay Rala Xanana Gusmão, ne’ebé hetan aprovasaun iha Konsellu Ministrus iha loron 20 fulan-outubru tinan 2015, no hetan inagurasaun liu tiha loron haat tuirmai.

Vídeo iha kraik ne’e fó hanoin mós kona-ba regra ambiente nian ida: “husi natureza labele hasai buat ida se la’ós fotografia, labele husik buat ida iha ne’ebá se la’ós ain-fatin, labele halakon buat ida iha ne’ebá se la’ós tempu no labele lori buat ida husi ne’ebá se la’ós rekordasaun…”