Ministru Estadu no Prezidénsia Konsellu Ministru no

  Portavós Ofisiál Governu Timor-Leste

 Dili, loron 25 fulan-novembru tinan 2016

Governu selebra Loron Proklamasaun Independénsia nian

Iha segunda oinmai, loron 28 fulan-novembru, Timor-Leste selebra aniversáriu da-41 Proklamansaun Independénsia nian. Governu apoia hela eventu lubuk boot ida iha país laran tomak, ne’ebé tinan ne’e sentradu iha Lospalus, Munisípiu Lautén. Iha tinan 1975, hafoin moris iha ukun koloniál nia okos iha tinan 400 nia laran, testu Proklamasaun Independénsia Repúblika Demokrátika Timor-Leste lee ba dala uluk husi Prezidente Repúblika dahuluk, Francisco Xavier do Amaral.

Eventu komemorasaun nian sira ne’e inklui Feira Nasionál ida iha Lospalus, iha loron 25, 26, 27 fulan-novembru, ne’ebé organiza husi Ministériu Komérsiu no Indústria, atu “hasa’e produtu lokál sira no reforsa ekonomia nasionál”. Membru Governu Konstitusionál VI nian barak maka sei asiste atividade sira ne’ebé iha, ne’ebé inklui aprezentasaun kulturá no muzikál sira no konkursu soru nian (teselajen), homan nian (sestaria), artezenatu, kail ikan ho anzól no traballu eskolár sira.

Iha loron 27 no 28 fulan-novembru, Komisaun Organizadora ba selebrasaun Proklamasaun Independénsia, ne’ebé lidera husi Ministru Estadu, Koordenadór Asuntu Administrasaun Estadu no Justisa no Ministru Administrasaun Estatál, Dionísio Babo Soares, prepara ona propgrama ida  ne’ebé fahe ba parte tolu ne’ebé inklui Misa Agradesimentu ida iha loron 27 lokraik, no serimónia ofísiál rua iha loron Proklamasaun Independénsia nian,  iha kuartél F-FDTL nian iha Lospalus.

Iha loron 28 fulan-novembru, ho inísiu iha tuku 8.00 dadersan, serimónia sira komesa ho Dada Sa’e Bandeira Nasionál. Tuir fali ho desfile militar ida, leitura ba testu Proklamasaun Independénsia nian, entrega Orden Timor-Leste husi Prezidente Repúblika no fó sai manán-na’in sira  ba “Prémiu nutrisaun”. Aleinde Prezidente Repúblika, Taur Matan Ruak, iha serimónia ne’e sei marka mós prezensa Prezidente Parlamentu Nasionál, Adérito Hugo da Costa, Primeiru-Ministru, Rui Maria de Araújo, no Prezidente Tribunál Rekursu, Guilhermino da Silva. Selebrasaun ofisiál ne’e sei taka ho Hatun Bandeira Nasionál.

Portavós Governu nian, Ministru Estadu Agio Pereira, reforsa katak “iha loron Proklamasaun ba ita-nia Independénsia, ita reflete kona-ba loron ida ne’ebé fó espresaun ba ita-nia aspirasaun sira ne’ebé aas liu kona-ba liberdade no autodeterminasaun. Ita aproveita husi reflesaun kona-ba dalan husi ita-nia luta ba ukun-rasik an no ita afirma hikas fali ita-nia dalan ba dezenvolvimentu”. REMATA