Proposta Governu nian kona-ba Orsamentu Jerál Estadu ba tinan 2017 (OJE tinan 2017) – lei n.47/III (da-5) hahú tama ona iha análize no diskusaun iha jeneralidade, iha loron 23 fulan-novembru, iha Parlamentu Nasionál.
Tuir buat ne’ebé Primeiru-Ministru, Rui Maria de Araújo, hateten, OJE tinan 2017 nian reflete responsabilidade , transparénsia, rigór no realizmu ne’ebé boot.
Valór ne’ebé tau iha orsamentu (dolar amerikanu millaun 1.386,8) ne’e ki’ik liu husi valór tinan 2016 nian. Tuir Rui Maria de Araújo, Governu prepara OJE tinan 2017 ho atensaun ba prioridade nasionál sira, hanesan, edukasaun, saúde, agrikultura no infraestrutura bázika sira, ne’ebé inklui bee-moos, saneamentu, konstrusaun no manutensaun estrada sira, irrigasaun, ponte, portu no aeroportu sira.
Reseita doméstika sira, maka taxa no impostu sira, hetan daudaun dezempeñu ida ne’ebé sólidu iha tinan 2016, no hein katak iha tinan 2017, bele aumenta 4,3% iha relasaun ho valór sira tinan ida ne’e nian, nu’udar rezultadu husi melloria ida husi servisu governamentál sira ne’ebé halo ona ba públiku no husi melloria sira iha nivel kobransa nian. Maibé, Primeiru-Ministru alerta katak dalan ba diversifikasaun ekonomia no dezenvolvimentu inkluzivu no sustentavel sei naruk no nakonu ho dezafiu sira. 
Diskursu Primeiru-Ministru nian ko’alia mós kona-ba atu aplika nafatin, la’ós de’it husi faze daruak Planu Estratéjiku Dezenvolvimentu nian maibé mós husi kompromisu Timor-Leste nian kona-ba Objetivu sira husi Dezenvolvimentu Sustentavel (ODS) Nasoins Unidas nian, no la haluha mós síklu eleitorál tinan 2017 no perspetiva sira kona-ba ekonomia mundiál no nasionál.
Votasaun iha jeneralidade ba proposta lei OJE nian hala’o to’o sesta, loron 25 fulan-novembru, tuir fali ho debate no votasaun iha espesialidade, hahú loron 30 fulan-novembru.
Atu hetan asesu ba Komunikadu Imprensa husi Portavós Governu kona-ba Proposta Lei OJE tinan 2017, klike iha ne’e.
Atu hetan asesu ba Diskursu Primeiru-Ministru nian durante aprezentasaun OJE tinan 2017 iha Parlamentu Nasionál, klike iha ne’e.