Komemorasaun aniversáriu da-41 Proklamasaun Independénsia nian
Data: loron 27 no 28 fulan-novembru
Fatin: Lospalos, Munisípiu Lautén
Tinan ne’e, komemorasaun Proklamasaun Independénsia nian sei hala’o iha Lospalos, iha Munisípiu Lautén.
Iha loron 27 fulan-novembru, sei hala’o misa agradesimentu ida, iha Igreja Parókia Lospalos nian, hahú iha tuku 4 lorokoraik.
Iha loron 28 fulan-novembru, kuartél F-FDTL nian, ne’ebé lokaliza iha Aldeia 30 de Agosto, iha Suku Fuiloru, sei sai fatin ba serimónia ofisiál sira.
Hahú iha tuku 8 dadeer, ho hasa’e Bandeira Nasionál, leitura testu Proklamasaun Independénsia nian no entrega prémiu ba manan-na’in sira kompetisaun “Prémiu nutrisaun nian”, mak atividade balu ne’ebé inklui iha serimónia ne’e.
Eventu ne’e sei konta ho prezensa husi Prezidente Repúblika, Taur Matan Ruak, Primeiru-Ministru, Rui Maria de Araújo, Prezidente Parlamentu Nasionál, Adérito Hugo da Costa, no Prezidente Tribunál Rekursu, Guilhermino da Silva.
