Funsionariu na’in-sanulu husi Prezidénsia Konsellu Ministrus (PKM) dezloka ba Portugál atu tuir formasaun ida kona-ba “Jestaun no Lideransa”, iha Imprensa Nasional- Casa da Moeda (INCM). Inisiativa ne’e halo parte ba akordu kooperasaun nian entre PKM no INCM ba área formasaun no área konsultoria téknika, ne’ebé asina ona iha tinan 2013.

Sekretáriu Estadu Konsellu Ministru, Avelino Coelho, dehan katak “PKM rekoñese importánsia husi serbisu hamutuk ho institusaun ne’ebé boot hanesan INCM, no mós ninia kapasidade atu forma funsionáriu timoroan sira”.

Iha ajenda, iha mós sorumutuk serbisu nian no vizita ba empreza fornesedór ekipamentu téknolójiku gráfiku nian sira (iha loron 8 to’o loron 9 fulan- novembru), no Forum XI Imprensa Ofisiál Lian Portugués nian sira (iha loron 10 to’o loron 12 fulan-novembru) iha ne’ebé Diretor-Jerál PKM nian, Victor Maia, ko’alia kona-ba tema “Evolusaun Grafika Nasionál Timor-Leste nian”. Oras ne’e daudaun, instituisaun ne’e iha hela reestruturasaun no modernizasaun nia laran. Iha nia Intervensaun, Diretor-Jerál konsidera katak kria daudaun ona “baze organizasaun nian ne’ebé adekuada ba estratejia empreza nian ida, ne’ebé define ona bazeia ba proposta husi instituisaun ne’ebé oras ne’e fó tutela ba tinan hirak oin mai, no implika reformulasaun ne’ebé boot iha metodolojia, téknika, prosedimentu no funsaun tradisionál sira husi editora-impresora ofisiál”

Formasaun remata iha loron 18 fulan-novembru.