Institutu Petróleu no Jeolojia (IPG-sigla iha lia-portugés) nian halibur investigadór, katedrátiku no espesialista internasionál sira iha Jeosiénsia nian iha kapitál Timor nian, hodi debate solusaun sira ne’ebé maka Siénsia Rai nian bele fó ba dezenvolvimentu no jestaun sustentavel komunidade Timor-Leste nian sira. “Konferénsia internasionál kona-ba Siénsia Rai nian no dezenvolvimentu sustentavel” hala’o iha Sentru Konvensaun Dili, husi loron 19 to’o 21 fulan-outubru, ho espozisaun oin-oin.

Espesialista na’in 8 iha Jeosiénsia no teknolojia, mai husi nasaun sira hanesan Estadu Naklibur sira (Estadus Unidus), Austrália no Indonezia, iha loron dahuluk nian ko’alia liu kona-ba tema ne’ebé relasiona ho rekursu jeolójiku, minerál, jeotérmiku, idrotermál no bee rai-okos sira iha Timor-Leste. Iha loron daruak nian, espesialista sira ne’e halo análize kona-ba jeosiénsia no teknolojia. Ikus liu, iha loron datoluk, sira ko’alia kona-ba problema sira hanesan mudansa naturál no ambientál no risku jeolójiku sira (rai-halai no rai-nakdoko), husi pontu vista Jeolojia no husi Jeofízika.

Buat importante ida iha konferénsia ne’e maka partisipasaun Ministru Petróleo no Rekursu Minerál, Alfredo Pires, nian ne’ebé loke no taka konferénsia ne’e no aprezenta, iha finál, relatóriu kona-ba estudu jeolójiku sira no mapeamentu país nian, ne’ebé IPG hala’o. Na’i-ulun sira seluk ne’ebé partisipa mós maka Vise-Ministru Finansas, Hélder Lopes, ne’ebé hatudu, iha loron datoluk, importánsia husi investimentu iha teknolojia jeoespasiál ba Timor-Leste, no Prezidente Zona Espesiál Ekonomia Sosiál Merkadu (ZEEMS) nian, Mari Alkatiri, ne’ebé fó hatene kona-ba progresu dezenvolvimentu ZEEMS nian.

Espesialista no jestór barak husi organizmu no institutu Governu nian sira kontribui mós ba debate ne’e, liuliu husi IPG, husi Autoridade Nasionál Petróleo no Minerál, husi TIMOR GAP, husi Diresaun Nasionál Estatístika Ministériu Finansas nian, husi Diresaun Nasionál Meteorolojia no Jeofízika no Diresaun Nasionál Kualidade Bee nian husi Ministériu Obras Públikas, Transporte no Komunikasaun, no husi Departamentu ALGIS no Agrometereolojia Ministériu Agrikultura no Peskas nian.

Aleinde akadémiku sira, partisipa mós iha konferénsia ne’e mak oradór sira husi empreza internasionál sira, maka hanesan Iron Fortune, Orica no Roman Road, iha área konstrusaun, estrasaun mineira no teknolojia estrasaun fatuk no minerál sira.

Durante eventu ne’e, hala’o kampaña doasaun ran nian ida ba banku Ospitál Nasionál Guido Valadares.