Ministru Estadu no Prezidénsia Konsellu Ministru no
Portavós Ofisiál Governu Timor-Leste
Dili, loron 11 fulan-novembru tinan 2016
Governu kolabora iha debate nakloke kona-ba Orsamentu ba tinan 2017
Nu’udar parte husi ninia kompromisu ba prosesu orsamentál nian ne’ebé transparente, Governu partisipa ona iha semináriu ida kona-ba “Perspetiva Orsamentál ba tinan 2017”, ne’ebé organiza husi Komisaun Finansas Públikas Parlamentu Nasionál nian. Kontributu sira ne’ebé detalladu liu mai husi Ministériu Finansas no Ministériu Planeamentu no Investimentu Estratéjiku.
Semináriu ne’e, ne’ebé hala’o iha Hotel Turismo, iha Dili, iha loron 10 no 11 fulan-novembru, buka tau-hamutuk kontribuisaun husi setór oioin iha sosiedade kona-ba proposta Orsamentu Jerál Estadu tinan 2017 nian, ne’ebé Governu aprezenta ona ba Parlamentu Nasionál iha loron 13 fulan-outubru. Entre partisipante sira ne’ebé mai, iha mós membru Governu nian sira no Parlamentu Nasionál, ONG, Parseiru Dezenvolvimentu nian sira, no mós reprezentante sira husi podér judisiáriu no husi Banku Sentrál. Kontributu sira husi aprezentasaun no debate sira ne’ebé halo ona tenke hatama iha relatóriu no paresér sira husi Komisaun Permanente Espesializada sira ne’ebé sei sai hanesan baze ba debate kona-ba Orsamentu ne’e iha Parlamentu Nasionál.
Totál ne’ebé propoin ona ba Orsamentu Jerál Estadu nian ba tinan 2017 maka dólar amerikanu millaun 1.386, ne’ebé hatudu redusaun ida kompara ho despeza hirak ne’ebé aloka ona iha tinan 2016. Iha nia deskrisaun no análize kona-ba orsamentu ne’e, Governu rejista ninia kompromisu “atu garante nivel despeza nian ida ne’ebé la aas liu, hodi mantein volume totál husi orsamentu ne’e no haree fila-fali programa sira ne’ebé eziste tiha ona, hodi garante retornu ne’ebé másimu husi kada dólar ne’ebé gasta ona”.
Proposta lubuk ida ne’ebé abranjente husi Livru Orsamentu nian disponivel ona iha site Ministériu Finansas nian atu públiku bele konsulta.
Projetu Lei n. 47/III(5a) – Orsamentu Jerál Estadu nian ba tinan 2017- sei debate iha Parlamentu Nasionál iha loron 22 fulan-novenbru tinan 2016 ho votasaun iha jeneralidade iha prazu loron tolu nia laran. Hafoin votasaun iha jeneralidade, sei halo diskusaun no votasaun iha espesialidade, ne’ebé sei hahú iha loron 25 fulan-novembru, prosesu ida ne’ebé sei dura másimu loron 10.
Hafoin análize kona-ba artigu ida-idak husi Projetu Lei ne’e, sei halo votasaun finál globál ida ba testu ne’e ho alterasaun hirak ne’ebé hetan ona aprovasaun iha Parlamentu Nasionál. Pasu hirak ne’e hotu tiha, dokumentu ikus – Lei kona-ba Orsamentu Jerál Estadu nian ba tinan 2017- sei haruka ba Prezidente Repúblika atubele hetan promulgasaun. REMATA