Ministru Estadu no Prezidénsia Konsellu Ministru no

  Portavós Ofisiál Governu Timor-Leste

 Dili, loron 10 fulan-novembru tinan 2016

Governu timorense felisita Prezidente eleitu Estadu Naklibur sira Amérika nian

Governu Timor-Leste felisita Donald J. Trump tanba eleitu ona nu’udar Prezidente Estadu Naklibur sira Amérika nian (Estadu Unidus Amérika).

Timor-Leste iha relasaun ida ne’ebé metin no di’ak ho Estadu Naklibur sira Amérika nian, bazeia ba interese no valór komún sira. Governu Estadu Naklibur sira Amérika nian sai ona defensór boot ida ba Timor-Leste, iha parseria ida ne’ebé buka atu haforsa demokrasia no kreximentu ekonómiku.

Primeiru-Ministru, Rui Maria de Araújo, iha nia surat felisitasaun nian ne’ebé haruka ba Prezidente eleitu, dehan katak Estadu Naklibur sira Amérika nian “hatudu solidariedade boot” ba povu timorense iha ninia restaurasaun independénsia, no katak “ita nafatin hetan benefísiu husi ligasaun amizade no kooperasaun nian ne’ebé forte”.

Governu dezeja ba Trump “susesu barak” bainhira kaer knaar Prezidente Estadu Naklibur sira Amérika nian no hatudu nia esperansa iha relasaun ho oportunidade atu serbisu ho Administrasaun Trump nian “iha kestaun sira ne’ebé sai interese nasaun rua nian no mós kooperasaun”.

Governu Timor-Leste hein katak lasu forte entre nasaun rua ne’e metin nafatin iha tinan hirak tuirmai, rezultadu husi interasaun ho Prezidente eleitu, ninia Administrasaun no Kongresu Estadu Naklibur sira nian. REMATA