Loron 1 fulan-novembru tinan 2016 marka pasajen prezidénsia rotativa Komunidade Nasaun Lia-Portugés sira [CPLP] ba Brazíl, iha Simeira Xefe Estadu no Governu nian sira, iha Brazília. Vídeo tuirmai halo rezumu ida kona-ba atividade prinsipál hirak ne’ebé Timor-Leste promove ona durante tinan rua ne’ebé nasaun ne’e kaer knaar prezidénsia Komunidade ne’e nian – husi fulan-jullu tinan 2014 to’o fulan-novembru tinan 2016.

Vídeo ne’e prodús husi ekipa Sekretáriu Estadu Komunikasaun Sosiál (Sekoms). Imajen sira iha vídeo ne’e hatudu didi’ak orientasaun ne’ebé fó ona atu hametin Komunidade ne’e liuhusi vertente emprezariál, importánsia Timor-Leste nian iha relasaun komersiál sira entre CPLP no nasaun sira husi Ázia-Pasífiku, interese komún iha esplorasaun rekursu minerál sira – ne’ebé foka liu ba idrokarbonetu sira -, importánsia husi habelar Lia-Portugés no solidariedade ho Giné-Bisau, iha ne’ebé Timor-Leste fó ona apoiu iha eleisaun lokál sira. Husi atividade barak ne’ebé maka hala’o ona durante tinan rua ikus ne’e, hirak ne’ebé importante liu maka Forum Ekonómiku Globál, Festivál Kulturál no Konferénsia Internasionál kona-ba futuru lia-portugés nian iha sistema mundiál.

Iha vídeo ne’e iha mós deklarasaun husi Prezidente Repúblika Timor-Leste nian, Taur Matan Ruak, husi Prezidente Rejiaun Administrativa Espesiál Oekusi Ambenu – Zona Ekonómia Sosiál Merkadu nian -, Mari Alkatiri, husi eis-Prezidente Repúblika no Nobel Pás nian, José Ramos-Horta, husi Ministru Petróleu no Rekursus Naturais, Alfredo Pires, husi Ministru Estadu, Koordenadór Asuntu Sosiál no Ministru Edukasaun nian, António da Conceição,  Sekretáriu Ezekutivu CPLP nian, Murade Murargy, husi eis-Primeiru-Ministru Giné-Bisau, Domingos Simões Pereira, no husi Ministru Ambiente, Ordenamentu Teritóriu no Enerjia Portugál nian, Jorge Moreira da Silva.

Prodús ona mós Relatóriu kona-ba Prezidénsia CPLP nian ne’ebé Timor-Leste kaer, ne’ebé Ministru Negósius  Estranjeirus, Hernâni Coelho mak aprezenta, iha Sorumutuk Konsellu Ministrus XXI nian iha Brazília, ne’ebé hala’o molok Simeira Xefe Estadu no Governu nian sira.

Iha loron 26 no 27 fulan-outubru, hala’o sorumutuk XXXIII Pontu Fokál Kooperasaun nian sira. Iha loron 29 fulan-outubru, hala’o  Sorumutuk Komisaun Konsertasaun Permanente.