Komunidade sira Maliana nian lakohi husik liu de’it, sira nia semana ne’e nia rohan, hodi partisipa iha Feira Livru husi Projetu Mais Portugés, ne’ebé hala’o iha eskola CAFE Odomau nian (Maliana), ho livru nia folin ne’ebé baratu liu no atividade oioin sira, inklui dada-lia ho autór sira livru nian. Interese ba aprendizajen no habelar kultura timoroan nian liuhusi Lian-Portugés bele haree iha atividade lúdikas (reakreativu ka ho brinkedu sira) no pedagójika (edukativu ka hanorin nian) boot sira ne’ebé aprezenta iha lian-portugés, husi profesór sira timoroan no portugéz.

Projetu Mais Portugés hetan tulun orsamentu husi Unidade Apoiu ba Sosiedade Sivíl Gabinete Primeiru-Ministru nian no iha parseria ho Embaixada Portugál no projetu CAFE (Sentru Aprendizajen no Formasaun Eskolár), hala’o Feira Livru ne’e,  iha loron 14 to’o loron 16 fulan-outubru.

Joaquim da Costa Freitas, Koordenadór Unidade Apoiu ba Sosiedade Sivíl Gabinete Primeiru-Ministru nian, konsidera katak “fa’an livru sira hala’o ho susesu, ne’ebé hakbiit liután hanoin atu kontinua hala’o Projetu Mais Portugés, iha tinan oin mai, ho  parseria ida ne’e, tanba hamutuk ita bele hetan liután rezultadu ne’ebé maka di’ak liu. Unidade Apoiu ba Sosiedade Sivíl husi Gabinete Primeiru-Ministru nian kompromete ona atu promove inisiativa sira ne’ebé fó sai tiha ona ba mundu luzófono no promove intervensaun Sosidade Sivíl CPLP nian”. 

Aleinde fa’an livru no atividade sira seluk, liuliu ba labarik sira, Konsertu Múzika Luzófono nian mós hetan susesu no hametin tan lasu sosiokulturál sira entre povu luzófono sira ne’ebé marka prezensa iha Feira Livru (Timór, Portugál no Brazíl).

Marka prezensa mós iha eventu ne’e Ministru Estadu, Koordenadór Asuntu Sosiál no Ministru Edukasaun, António da Conceição no Embaixadór Portugál nian iha Dili, Manuel Gonçalves de Jesus.