Governu partisipa iha “Labarik-feto sira kaer podér”, inisiativa ida husi Plan International iha Timor-Leste ne’ebé hetan apoiu husi Rede Feto no halo parte iha komemorasaun sira kona-ba Loron Internasionál Labarik-Feto nian.

Labarik-feto sira husi Timor-Leste hamutuk ho labarik-feto atus ba atus husi nasaun 50 resin husi mundu tomak, atu “kaer” knaar líderansa nian sira, iha ne’ebé responsavel polítiku sira no intergovernamentál sira “fó” sira-nia kargu durante loron ida atu labarik-feto sira bele kaer.

Iha loron 10 fulan-outubru, Olinda no Elfia, ho idade tinan 18 hotu, “kaer” knaar Vise-Ministra Edukasaun, Dulce Jesus Soares ninian no sira halo debate kona-ba reabilitasaun eskola sira, jestaun kona-ba orsamentu ba formasaun profesór sira nian no implementasaun programa suplementár ai-han nian ida.

Clara (tinan 16) no Sidaglia (tinan 14) kaer knaar Sekretáriu Estadu Juventude no Desportu, Leovigildo Hornay ninian.

Iha loron 11 fulan-outubru, iha Loron Internasionál Labarik-feto nian, “Marxa – Labarik-feto sira ne’ebé kaer podér” remata iha Gabinete Sekretariadu Juventude no Desportu, iha ne’ebé Sekretáriu Estadu Juventude no Desportu nian no labarik-feto balun ne’ebé envolve iha inisiativa “kaer podér” ne’e halo diskursu ba ema sira ne’ebé maka marka prezensa iha ne’ebá. 

Primeiru-Ministru, Rui Maria de Araújo, deklara iha Sorumutuk Nasoins Unidas ne’ebé halibur dirijente sira husi nasaun hotu iha tinan 2015, atu halo debate kona-ba Igualdade jéneru no Hakbiit Feto sira, katak “pozisaun feto no labarik-feto sira nian hanesan teste importante ida ba progresu no dezenvolvimentu” no katak “ita tenke hadi’a situasaun feto sira nian no ko’alia kona-ba diskriminasaun jéneru nian, atu ita bele kumpre duni ita-nia objetivu dezenvolvimentu nian sira”.

Vise-Diretora Plan Internasionál nian iha Timor-Leste, Dillyana Ximenes, hateten katak: “Labarik-feto sira kaer podér” sai hanesan oportunidade importante ida ba labarik-feto sira atu hatuur an iha líder sira-nia fatin no hatene kompeténsia saida de’it maka sira presija atu sai luder ne’ebé di’ak aban bainrua.”

Plan International haksolok ho tulun husi Governu no kompromisu ne’ebé hala’o iha ámbitu inisiativa ida ne’e nian. Vise-Diretora Plan International iha Timor-Leste subliña katak “Igualdade Jéneru iha Timor-Leste so bele iha bainhira labarik-feto no labarik-mane sira, feto no mane serbisu hamutuk ba igualdade jéneru, atu nune’e labarik-feto no feto sira partisipa ho dalan ne’ebé ekilibradu iha prosesu foti desizaun nian sira.”

Portavóz Governu nian observa katak Governu kompromete an ona atu aplika Objetivu sira husi Dezenvolvimentu Substentavel nian foun, inklui Objetivu 5 “Atu alkansa igualdade jéneru no kapasita feto no labarik-feto sira hotu.” Hodi hatutan, Portavóz Governu nian ne’e afirma katak “nida ne’e atu dehan katak ita presiza halo buat hotu ne’ebé maka ita bele halo atu garante katak ita-nia labarik-feto sira iha oportunidade ne’ebé hanesan atu aprende no lídera. Ita nia rain so bele moris-di’ak no realiza nia potensiál, bainhira ita-nia labarik-feto sira moris iha ambiente ne’ebé maka tulun sira atu dezenvolve no atinje sira-nia potensiál.”

Governu felisita Plan Internasionál no Rede Feto ba inisiativa “Labarik-feto sira kaer podér” no atividade sira promosaun direitu feto sira nian no igualdade ba labarik-feto sira iha Timor-Leste.