Governu aprezenta kondolénsia ba Tailándia
Ministru Estadu no Prezidénsia Konsellu Ministru no
Portavós Ofisiál Governu Timor-Leste
Dili, loron 14 fulan-outubru tinan 2016
Governu aprezenta kondolénsia ba Tailándia
Governu hato’o ninia sinsera kondolénsia ba Família Reál Tailándia nian no povu tailandés tanba Liurai Bhumibol Adulyadej nia mate. Liurai ne’e, ukun durante tinan 70 no hala’o nia knaar importante iha orientasaun no dezenvolvimentu sosiál no ekonómiku Tailándia nian.
Liurai ne’e mate, iha loron 13 fulan-outubru, hafoin moras ne’ebé kleur, tuir mai sei lutu durante fulan 12 nia laran.
Durante tempu ninia ukun ne’e, Liurai Bhumibol haree liu ba dezenvolvimentu rekursu umanu nian sira no hahú ho projetu barak-barak iha área hanesan agrikultura, irrigasaun, no mós saúde públika. Iha kontestu relasaun metin entre Timor-Leste no Tailándia, ninia projetu balun kona-ba “Ekonomia Sufisiénsia” aplika tiha ona iha zona rurál sira ne’ebé besik iha Dili, iha tinan 2003. Tailándia nasaun ida ne’ebé nu’udar nasaun dahuluk mak estabelese relasaun diplomátika sira ho Timor-Leste iha tinan 2002 no kontribui ho pesoál militár, polísia no membru sira sosiedade sivíl nian durante tempu tranzisaun hodi tama ba-iha rejime demokrátiku, tuir ho referendu tinan 1999 nian.
Portavóz Governu nian, Ministru Estadu Agio Pereira, haree katak “iha tempu lakon nian ne’e, ita hatudu ita-nia solidariedade ba povu Tailándia nian, hato’o mós ita-nia sinsera kondolénsia ba Família Reál no ita-nia estima ba Liurai matebian ne’e”. REMATA
