Governu komemora tinan 20 Nobel Pás ba ilustre timoroan na’in-rua ho konferénsia internasionál
Ministru Estadu no Prezidénsia Konsellu Ministru no
Portavós Ofisiál Governu Timor-Leste
Dili, loron 11 fulan-outubru tinan 2016
Governu komemora tinan 20 Nobel Pás ba ilustre timoroan na’in-rua ho konferénsia internasionál
Primeiru-Ministru no membru Governu sira partisipa iha konferénsia internasionál kona-ba “Sidadania, pás no moris-di’ak”, hodi marka tinan-ruanulu atribuisaun Prémiu Nobel Pás nian ba Don Carlos Filipe Ximenes Belo no José Manuel Ramos-Horta.
Iha loron 11 fulan-outubru tinan 1996, Komité Prémiu Nobel fó ónra dala ida de’it ba oan-mane Timór nian na’in-rua husi sira-nia “serbisu atu hetan solusaun ida ne’ebé justa no pasífika ba konflitu iha Timor-Leste” no hatudu laran-metin katak atribuisaun ne’e sei fó motivasaun” esforsu sira hodi hetan solusaun diplomátika ida ba konflitu iha Timor-Leste, tuir direitu ukun-rasik an povu nian”. Primeiru-Ministru, Rui Maria de Araújo, hateten katak “atribuisaun ba prémiu ne’e, aleinde reprezenta rekoñesimentu internasionál ba serbisu exesionál ne’ebé halo ona husi na’i-ulun rua ne’e, iha ona impaktu ida ne’ebé boot tebes ba povu timoroan, iha luta ba nia ukun-rasik an.
Ba ilustre personalidade estranjeira sira ne’ebé partisipa iha programa ida ne’ebé lori sira mai to’o iha Díli, iha loron 7 no 8 fulan-outubru, laureadu sira Prémiu Nobel nian iha área Pás, Fízika, Ekonomia no Medisina, mai hamutuk ho delegadu timoroan barak, liuliu partisipasaun maka’as husi foin-sa’e sira. Iha ninia diskursu enseramentu konferénsia nian, Primeiru-Ministru hateten ba estudante universitáriu foin-sa’e sira no eskola sekundáriu nian, “apela ba ita nia klosan sira, hanesan ajente sira ba mudansa, hanesan líder ita nia país iha tempu oin mai, katak imi tenke partisipa iha dezenvolvimentu nasional, katak imi tenke hola atitude no komportamentu hirak konxiente ne’ebé bele fo marka liu hosi diferensa pozitiva ba sosiedade no ba país”.
Na’i-ulun membru Governu nian sira partisipa iha tema hirak hanesan Justisa no Direitus Umanus, Negósiu, Ekonomia no Finansa, Siénsia no Teknolojia, Saúde no Medisina. Antigu Prezidente Mosambike, Joaquim Chissano, partisipa no ko’alia kona-ba “Pás no Estabilidade hodi Harii Nasaun ida Bazeia ba Estadu Direitu.” Omenajeadu sira, Bispu Belo labele partisipa, tanba razaun saúde, no José Ramos-Horta, antigu Prezidente Repúblika no antigu Konsellu Ministrus, ko’alia kona-ba tema “Dezenvolvimentu ba Pás, Estabilidade no Demokrasia”.
Portavós Governu nian, Ministru Estadu Agio Pereira, hateten katak “konferénsia ida ne’e, ho nia tema “Sidadania, Pás no Moris-di’ak”, ho partisipasaun husi na’in ulun sira no haree liuliu ba foin-sa’e, hanesan forma di’ak ida hodi selebra tinan 20 atribuisaun Prémiu Nobel Pás nian tinan 1996, ba Don Carlos Ximenes Belo no José Manuel Ramos-Horta”. REMATA
