Governu, liuhusi Sekretaria Estadu Komunikasaun Sosiál, dezenvolve ona vídeo ida kona-ba importánsia ba prezervasaun ambiente iha tasi- ibun sira, fó  hanesan ezemplu serbisu ne’ebé maka hala’o hela husi movimentu Tasi Moos.

Movimentu voluntáriu ida ne’e husi sidadaun sira ne’ebé preukupa duni ho ambiente hodi bolu atensaun ba populasaun kona-ba problema fo’er (lixu) ne’ebé maka husik hela iha tasi-ninin, liuhusi kampaña edukasaun sívika ida ne’ebé haree liu ba atu hili fo’er iha tasi ibun sira kapitál nian. Inisiativa ne’e hahú iha ona iha tinan 2015, inisiativa husi grupu foinsa’e sira ne’ebé maka halibur malu atu hamoos tasi Dolok Oan. Kampaña ida ne’e hetan ona apoiante barak, inklui membru Governu sira, hanesan Ministru Estadu Estanislau da Silva no Vise-Ministru Agrikultura no Peska nian, Marcos da Cruz, ne’ebé mak iha fulan-abríl tinan ne’e, sira foti ona inisiativa hodi halo limpeza jerál ida iha tasi-ibun Bidau-Lesidere nian, iha Dili, ho tulun husi movimentu Tasi Moos. Hafoin liu tiha fulan ida, iha ámbitu sorumutuk Ministru sira Asuntu Tasi nian husi Komunidade País sira Lia-Portugés (CPLP), aprezenta ona kampaña governamentál “Praia Limpa, ambiente saudável”, iha Praia dos Coqueiros, iha sede CPLP nia oin, ne’ebé maka konta mós ho tulun movimentu Tasi Moos nian ne’e.

Vídeo ne’e agora prodús ona husi Sekretaria Estadu Komunikasaun Sosiál hatudu loron limpeza nian ida, ho voluntáriu sira atus ba atus, iha Tasi Dolok Oan. Objetivu husi filme ida ne’e mak atu fó atensaun ba importánsia hodi prezerva patrimóniu naturál Timor-Leste nian,  ho tasi-ibun ne’ebé furak tebetebes no ho biodiversidade tasi nian ne’ebé riku liu iha planeta ne’e. Buat rua ne’e hotu iha risku tanba laiha respeitu ba ambiente tanba ema ne’ebé so’e fo’er la haree ba konsekuénsia husi hahalok aat ida ne’e.

La kleur tan video ne’e disponivel ona iha rede social sira no iha Televizaun Timor-Leste (TVTL).