Konferénsia Ministeriál da-5 husi Forum ba Kooperasaun Ekonómika no Komersiál entre Xina no País Lia-Portugés nian sira
Loron: Husi 10 to’o loron 12 fulan-outubru
Fatin: Makau, Xina
Eventu ne’e, harii iha fulan-outubru tinan 2003, tuirmai hanaran “Forum Makau”, hanesan inisiativa ida husi Governu Sentrál Xina nian, iha koordenasaun ho nasaun Lia-Portugés nian hitu, hanesan Angola, Brazíl, Kabuverde, Giné-Bisau, Mosambike, Portugál no Timor-Leste. Importante atu temi kolaborasaun husi Governu Rejiaun Administrativa Espesiál Makau nian (RAEM)
Hahú kedas tempu forum ne’e harii, aprova ona Planu sira no Asaun ba Kooperasaun Ekonómika no Komersiál ne’ebé define área kooperasaun inter-governamentál nian sira, hodi kontribu, ho forma ativa, ba dezenvolvimentu kooperasaun iha ámbitu ekonomia, komérsiu no investimentu.
Husi parte Timor-Leste nian, ida ne’ebé sei reprezenta Primeiru-Ministru, Rui Maria de Araújo, maka Ministru Estadu, Koordenadór Asuntu Ekonómiku no Ministru Agrikultura no Peska, Estanislau da Silva. Sei hola parte mós iha delegasaun ne’e maka Ministru Komérsiu, Indústria no Ambiente, Constâncio da Conceição Pinto, nune’e mós Ministru Obras Públikas, Transportes no Komunikasoins, Gastão de Sousa, no Asesór Seniór Ministru Planeamentu no Investimentu Estratéjiku, Pedro Lay.
Sei marka mós prezensa iha Forum Makau nian maka Primeiru-Ministru Portugál, António Costa, Primeiru-Ministru Mosambike, Carlos Agostinho do Rosário, Primeiru-Ministru Giné-Bisau, Baciro Djá no Primeiru-Ministru Kabuverde, Ulisses Correia e Silva.
Molok Forum Makau nian ne’e hahú, sei iha uluk Sorumutuk Pontu Fokál sira nian, ne’ebé sei hala’o iha loron 7 fulan-outubru.
Iha Sorumutuk Pontu Fokál sira nian ne’e sei marka prezensa reprezentante sira husi Departamentu Ajuda Esterna nian; reprezentante sira husi Departamentu Kooperasaun Ekonómika no Investimentu iha Rai-li’ur, Departamentu Asuntu Taiwan, Hongkong no Makau nian sira; reprezentante sira husi Governu RAEM nian; Embaixadór no Pontu Fokál sira husi nasaun Lia-Portugés nian hitu no delegadu sira husi Sekretariadu Permanente.
Iha Sorumutuk Pontu Fokál sira nian ne’e sei diskute no aprova Planu Asaun ba Kooperasaun Ekonómika no Komersiál, nune’e mós Memorandu Entendimentu kona-ba Promosaun Kooperasaun ba Kapasidade Produtiva nian.
Iha loron 11 fulan-outubru sei marka ho asinatura ba Planu Asaun no Memorandu Entendimentu nian ne’ebé temi iha leten.
Iha loron 10 fulan-outubru, Ministru Estadu, Koordenadór Asuntu Ekonómiku no Ministru Agrikultura no Peska nian, Estanislau da Silva sei hala’o tan sorumutuk kortezia ida ho Primeiru Ministru Giné-Bisau nian, Baciro Djá.
