Konferénsia Internasionál selebrasaun tinan 20 atribuisaun Prémiu Nobel Pás nian ba na’i-ulun timoroan sira
Loron: 7 to’o loron 9 fulan-outubru
Fatin:Dili
Loron 11 fulan-outubru marka aniversáriu da-20 atribuisaun Prémiu Nobel Pás nian ba Amu Bispu Don Carlos Ximenes Belo no antigu Rezistente no Prezidente Repúblika Timor-Leste nian, José Ramos Horta.
Iha ámbitu komemorasaun ida ne’e, iha sidade Dili simu Konferénsia Internasionál ida ho tema “Sidadania, pás no moris-di’ak: importánsia hamenus kiak iha konsolidasaun pás nian”.
Aleinde manan na’in timoroan na’in rua ne’e, partisipa mós iha konferénsia ida ne’e Kailash Satyarthi, Prémiu Nobel Pás tinan 2015 nian, Brian Schmidt, Prémiu Nobel Fízika tinan 2011 nian, Finn Erling Kydland, Prémiu Nobel Ekonomia tinan 2004 nian, Muhammad Yunus, Prémiu Nobel Pás tinan 2016 nian no Richard John Roberts, Prémiu Nobel Medisina tinan 1993 nian.
Marka mós prezensa antigu Prezidente Repúblika Mosambike, Joaquim Alberto Chissano, Konselleiru Espesiál Sekretáriu-Jerál Nasoins Unidas nian ba Prevensaun Jenosídiu, Adama Dieng, Bispu Luteranu Eméritu Oslo nian Reverendu Gunnar Johan Stålsett no sira seluk.
Eventu ne’e sei iha atividade iha fatin oin-oin iha sidade Dili, maka hanesan Ministériu Negósius Estranjeirus no Kooperasaun, Palásiu Prezidensiál, Otél Novu Turizmu, Otél Timor Plaza, Otél Timor, Universidade Nasionál Timor Lorosa’e (UNTL), Universidade Pás (UNPAZ), Institutu Teknolojia Dili no INFORDEPE.
