Primeiru-Ministru Rui Maria de Araújo, no Membru Governu balun, hasoru malu ho Sekretáriu-Jerál Nasoins Unidas (ONU) nian, Ban Ki-moon, iha loron 24 fulan-setembru, iha sede Nasoins Unidas nian, iha Novaiorke.

Iha ninia sorumutuk privadu ne’e, Primeiru-Ministru hato’o konsiderasaun ne’ebé kle’an husi Timor-Leste ba apoiu husi Sekretáriu-Jerál ONU nian, durante tinan sanulu nia kaer kargu ne’e, no espresa ninia fiar katak lideransa Ban Ki-moon nian sei husik hela liman-rohan ne’ebé sei la-lakon

Rui Maria de Araújo manifesta ona valór aas ne’ebé Governu Timor nian fó ba Nasoins Unidas, ne’ebé iha papél fundamentál ida iha restaurasaun soberania Timor-Leste nian iha tinan 2002 no ne’ebé sei kontinua hala’o papél importante ida, iha asisténsia ne’ebé fó ba rezolusaun soberania iha Tasi Timór, liuhusi prosesu Konsiliasaun ne’ebé agora hala’o hela, ne’ebé dezenvolve tuir Konvensaun Nasoins Unidas kona-ba Direitu ba Tasi.

Iha nia rezumu husi sorumutuk ne’e, Sekretáriu-Jerál “hato’o ninia konsiderasaun ba Timor-Leste tanba kaer knaar lideransa nian ida iha elaborasaun Programa Dezenvolvimentu Sustentavel ba tinan 2030 no nia Objetivu sira husi Dezenvolvimentu Sustentavel (ODS), liuliu ODS 16, kona-ba sosiedade pasífika no inkluziva, asesu ba justisa no instituisaun transparente no responsavel sira”.

Ulun boot ne’e mós koa’lia kona-ba knaar Timor-Leste nian iha dezenvolvimentu g7⁺ nian no sauda kompromisu timoroan nian kona-ba realizasaun eleisaun hirak ne’ebé pasífika no inkluziva iha tinan 2017.

Primeiru-Ministru akompaña husi Ministru Planeamentu no Investimentu Estratéjiku, Kay Rala Xanana Gusmão, Ministru Negósius Estranjeirus no Kooperasaun, Hernâni Coelho, no Reprezentante Permanente Timor-Leste nian iha Nasoins Unidas, Embaixadora Milena Pires.

Ban Ki-Moon, ne’ebé sei remata nia mandatu nu’udar Sekretáriu-Jerál iha tinan ida ne’e nia rohan, vizita ona Timor-Leste iha tinan 2007 no 2012.