Governu promove kampaña informasaun públika molok eleisaun lokál sira
Ministru Estadu no Prezidénsia Konsellu Ministru no
Portavós Ofisiál Governu Timor-Leste
Dili, loron 23 fulan-setembru tinan 2016
Governu promove kampaña informasaun públika molok eleisaun lokál sira
Governu promove hela kampaña informasaun públika ida kona-ba Lei Suku sira nian foun no eleisaun lokál sira tuirmai, ne’ebé sei hala’o iha loron 29 fulan-outubru tinan ne’e. Ministériu Administrasaun Estatál no Sekretariadu Tékniku Administrasaun Eleitorál [STAE] dezloka ona ba territóriu laran tomak, ne’ebé sei liu ba munisípiu 12 iha Timor-Leste no Zona Espesiál Oekusi Ambenu, Suku 442 no Aldeia 2.225, hodi prepara eleitór sira atubele hala’o knaar importante husi sira-nia direitu demokrátiku sira ne’e.
Iha loron 29 fulan-outubru, sidadaun sira husi aldeia ida-idak sei hili delegadu feto ida no mane ida, hodi reprezenta sira-nia aldeia iha Konsellu Suku, Xefe Aldeia ida no Xefe Suku ida. Governu, liuhusi, Lei Suku sira nian foun, insentiva partisipasaun feto sira nian atu hala’o knaar lideransa nian, inklui hanesan kandidata sira ba Xefe Aldeia no Xefe Suku.
Konsellu Suku ida-idak husi 442 ne’ebé eziste iha nasaun ne’e sei hala’o sorumutuk iha loron 30 fulan-outubru, atu determina rezultadu finál sira husi eleisaun Xefe Suku sira nian. Karik presiza hala’o volta daruak, maka sei hala’o iha loron 13 fulan-novembru. Ida ne’e liu tiha sei depende ba Konsellu Suku atu hala’o sorumutuk iha loron 9 ka 24 fulan-novembru nian, hodi hili “lia-na’in”[lia-na’in ne’ebé haknaar an nu’udar na’i ulun tradisional nian] no reprezentante foin-sa’e nian na’in rua, mane ida no feto ida, hodi integra ba Konsellu.
Tanba ne’e konsellu Suku ida-idak sei kompletu, kompostu husi Xefe Suku, Xefe Aldeia sira Suku nian, delegadu feto ida no mane ida husi Aldeia ida iha Suku laran, reprezentante mane ida no feto ida husi foin-sa’e Suku nian no “lia-na’in” ida.
Kalendáriu kompletu ba eleisaun lokál sira bele haree iha Portál Governu nian.
Suku sira hala’o ona knaar lideransa nian iha konsesaun no ezekusaun projetu infraestrutura lokál sira, iha ámbitu Programa Nasionál Dezenvolvimentu Suku [PNDS] no Programa Planeamentu ba Dezenvolvimentu Integradu Munisipál [PDIM] nian. Hadi’a kapasidade sira no preparasaun estruturál ba prosesu desentralizasaun bazeia ba Konstituisaun Repúblika Demokrátika Timor-Leste no Planu Estratéjiku Dezenvolvimentu tinan 2011-2030, no sai hanesan parte importante ida husi Programa Governu Konstitusionál VI nian.
Iha semestre dahuluk tinan 2017 nian, nasaun ne’e sei hili Prezidente Repúblika tuirmai no deputadu foun sira ba Parlamentu Nasionál.
Portavós Governu nian, Ministru Estadu Agio Pereira, agradese ba dirijente komunitáriu sira ne’ebé hala’o ona knaar ho haka’as an tomak iha prosesu demokrátiku eleisaun Suku nian sira ne’e, hodi hateten katak “biban ba atu hili liuhusi votu sekretu reprezentante lokál sira ne’ebé tuir ita-nia hakarak nu’udar biban ida ne’ebé ita-nia povu nunka hetan iha luta tinan barak nia laran ba ukun-rasik an nian. Tanba ne’e mós mak ita tenke aproveita, iha semana hirak oinmai, atu ezerse ita-nia liberdade demokrátika sira ne’ebé ita hetan ho susar tebtebes”. REMATA
