Iha loron 16 fulan-setembru liubá, hala’o serimónia entrega sertifikadu partisipasaun nian iha asaun formasaun espesializada iha investigasaun kriminál iha ámbitu halo osan-falsu, iha instalasaun Polísia Sientífika Investigasaun Kriminál (PSIK) iha Kaikoli, Dili.

Formasaun ne’ebé hala’o iha semana rua nia laran ne’e, fó ba kuadru 17 husi Polísia Sientífika Investigasaun Kriminál, ne’ebé kompostu husi Inspetór no Peritu Forense nian sira husi órgaun Polísia Kriminál ne’e. Asaun ne’e asegura husi ekipa ida ne’ebé kompostu husi inspetór na’in-rua- Dário Andrade no Elsa Sá –, sira na’in-rua mai hotu husi Polísia Judisiária Portugál nian.

Asaun formasaun ne’e, nu’udar asaun penúltima husi siklu formasaun ba tinan rua 2015-2016, fó kontinuasaun, hakle’an no konsolida formasaun téknika no dezenvolvimentu kompeténsia nian sira iha área Investigasaun Kriminál, husi Polísia Sientífika no análize laboratoriál sira iha Timor-Leste.

Formasaun ne’e tama iha Komponente Justisa husi Programa Apoiu ba Governasaun Demokrátika Timor-Leste nian, kooperasaun ne’ebé Uniaun Europeia delega ba Portugál, liuhusi Instituto Camões, IP – Instituto da Cooperação e da Língua. Iha parseria ho Ministériu Justisa Timor Leste no entidade lokál sira seluk, kooperasaun ne’e akompaña ona, hahú kedas tinan 2012, kriasaun órgaun foun Polísia Kriminál ne’ebé iha espesializasaun aas, iha área ida ne’ebé fundamentál ba dezenvolvimentu Timor-Leste nian. 

Polítika Sientífika Investigasaun Kriminál, ne’ebé harii iha tinan 2014, kompostu husi investigadór na’in 47 no Peritu Forense na’in 31, sira hotu tuir ona formasaun iha ámbitu Programa ne’e nian, iha Timor-Leste no iha Eskola Polísia Judisiária nian iha Portugál.

Marka prezensa iha serimónia ne’e maka Diretór Nasionál PSIK nian, Vicente Fernandes de Brito, Adida ba Kooperasaun Embaixada Portugál nian, Daniela Pereira, no Jestór ba Programa, Pierre-Yves Lucas, husi Delegasaun Uniaun Europeia nian iha Timor-Leste.