Ministru Estadu no Prezidénsia Konsellu Ministru no

  Portavós Ofisiál Governu Timor-Leste

 Dili, loron 13 fulan-setembru tinan 2016

Komisaun Revizaun Orsamentu Governu nian konklui konsulta

Iha loron 5 fulan-setembru, Komisaun Revizaun Orsamentu Governu nian konklui ona ninia konsulta sira ho Ministériu no Sekretaria Estadu sira, instituisaun no organizmu Estadu nian sira, ne’ebé hala’o iha semana hirak liubá hanesan parte husi prosesu orsamentál nian ne’ebé rigorozu ba tinan 2017.

Komisaun Revizaun Orsamentu nian ne’e prezide husi Primeiru-Ministru, Rui Maria de Aráujo, Ministra Finansas, Santina Cardoso, ne’ebé kaer knaar hanesan Vise-Prezidente no inklui mós Ministru Estadu, Koordenadór Asuntu Sosiál no Ministru Edukasaun, Ministru Estadu, Koordenadór Asuntu Ekonómiku no Ministru Agrikultura no Peskas, Ministru Planeamentu no Investimentu Estratéjiku, no Ministro Obras Públikas, Transportes no Komunikasaun.

Komisaun bolu entidade Estadu nian ida-idak atu hola parte iha enkontru ne’e, hodi aprezenta sira-nia planu, projetu, no orsamentu espesífiku sira ba tinan 2017, no hodi hatán ba pergunta sira husi membru Komisaun nian sira. Projetu ne’e hetan tulun husi Unidade Planeamentu no Monitorizasaun ne’ebé harii iha ámbitu Gabinete Primeiru-Ministru nian, ne’ebé serbisu hamutuk ho Ministériu Finansas. Komisaun buka ona dalan atu tulun Ministériu sira iha prosesu preparasaun orsamentu, hodi tulun instituisaun Governu nian ida-idak atu define sira-nia programa prioritáriu sira no halo kontrolu trimestrál ida kona-ba despeza husi sira-nia atividade.

Komisaun Revizaun Orsamentu nian no serbisu ne’ebé Unidade Planeamentu Monitorizasaun hala’o nu’udar refleksu husi kompromisu Governu Konstitusionál VI nian hodi  asegura katak Orsamentu Anuál Estadu prepara  atu serbí di’ak liután ba povu, ho servisu públiku ida ne’ebé efisiente, efikás no responsavel liu.

Rezultadu sira husi konsulta rigoroza hirak ne’e halo parte ba preparativu sira – ne’ebé la’o hela – ba Orsamentu Jerál Estadu nian ba tinan 2017, ne’ebé tenke entrega ba Parlamentu Nasionál hodi hetan apresiasaun iha fulan-outubru.

Portavós Governu nian, Ministru Estadu Agio Pereira, afirma ona katak “oras barak ne’ebé Primeiru-Ministru no membru Komisaun nian investe iha prosesu konsulta nian ida ne’e hatudu determinasaun Governu nian atu jere fundu públiku sira no atu garante kualidade husi Orsamentu Jerál Estadu nian ba tinan 2017, liuhusi planeamentu ida ne’ebé di’ak no análize ida ne’ebé halo ho kuidadu. Governu iha objetivu atu halo Orsamentu tinan 2017 nian sai efikás tuir posibilidade hotu ne’ebé iha, atubele alkansa ita-nia nasaun nia dezenvolvimentu no serbí ita-nia povu ho di’ak.“