Governu Timor-Leste

Ministru Estadu no Prezidénsia Konsellu Ministru no

  Portavós Ofisiál Governu Timor-Leste

 Dili, loron 9 fulan-setembru tinan 2016

Governu halo ona preparativu ikus sira ba Tour Timor no Maratona Dili

Governu organiza hela eventu desportivu boot rua ne’ebé promove partisipasaun husi atleta nasionál sira no dada vizitante sira husi mundu tomak. Tour Timor, halai taru bisikleta nian ida, ne’ebé, husi loron 13 to’o 17 fulan-setembru, sei la’o hadulas paizajen furak Timor-Leste nian, no Maratona Dili, ne’ebé sei hala’o iha loron 9 fulan-outubru, iha kapitál nasaun nian.

Organizasaun ba eventu rua ne’e, ne’ebé xefia husi Sekretáriu Estadu Juventude no Desportu, Leovigildo Hornay, atualiza ona ba Primeiru-Ministru, Rui Maria de Araújo, iha semana ida ne’e kona-ba medida hirak ne’ebé maka foti daudaun atu hadi’a seguransa no fó satisfasaun ba partisipante sira hotu. Iha fulan-jullu, reprezentante sira husi Polísia Nasionál Timor-Leste, Sekretaria Estadu Juventude no Desportu, Sekretaria Estadu ba Polítika Formasaun Profisionál no Empregu no husi instituisaun saúde Australia nian, National Critical Care and Trauma Response Centre, la’o tiha ona tuir dalan ne’ebé sei uza ba halai taru bisikleta ne’e, atu garante katak iha dalan hirak ne’e tau hotu ona marka no katak komunidade lokál sira hatene ona kona-ba ida ne’e. Ministériu Turizmu, Arte no Kultura mós envolve iha planeamentu, atu asegura instalasaun hirak ne’ebé konfortavel ba partisipante sira hodi bele toba kalan durante halai-taru bisikleta.

Tour Timor ne’e sei liuhusi zona hirak ne’ebé espetakulár liu iha país ne’e. Durante etapa lima ne’e siklista sira sei halai liuhusi estrada hirak ne’ebé liga Dili ba Manatutu, Manatutu ba Kelikai, Kelikai ba Iliomár, Iliomár ba Lospalos, no Lospalos ba Baukau. Prémiu totál besik dolar amerikanu rihun 58 no etapa dahuluk no dahikus prova nian rejista ona husi Uniaun Siklista Internasionál, hodi permite manan-na’in sira tau hamutuk pontu ba sira-nia klasifikasaun internasionál.

Maratona Dili, iha loron 9 fulan-outubru, loke kompetisaun tolu ba atleta sira, ekipa amadora sira no família sira: maratona kompletu ida (kilómetru 42), metade husi maratona ida (kilómetru 21) no “Fun Ran” ida (halai-taru hamutuk rame-rame, kilómetru 7). Hanesan ho Tour de Timor, Maratona Dili dada desportista nasionál no internasionál sira, no inklui prémiu ho valór osan ne’ebé boot. Eventu rua ne’e, ne’ebé antigu Prezidente, Dr. José Ramos-Horta, maka kria, sai ona hanesan símbulu eventu desportu nian sira ba nasaun.

Hodi Governu nia naran, Ministru Estadu Agio Pereira, fó parabéns ba organizasaun no patrosionadór sira, hodi hateten katak eventu espesiál sira ne’e “fó biban ba hamoris ekonomia iha distritu sira, haburas turizmu, kria persesaun  internasionál ida ne’ebé pozitiva no hametin pás, armonia no orgullu nasionál.” REMATA